Shillong, Jylliew 10 : Ka National People’s Youth Front (NPYF) ha ka Sngi Nyngkong kala ai khublei iaka Meghalaya Police, Special Investigation Team, NDRF, SDRF, NESAC, ki tnad syntiat ka thain, ki Dorbar Shnong jong ka thain Sohra, ka West Jaintia Hills Mountaineering Club bad baroh kito kiba donbynta ha ka jingleit wad ia ka jingjah jong ki shi kurim kiba na Indore.
Haba iakren bad ki nongpathai khubor, u National President jongka NPYF Bah Nicky Nongkhlaw ula ong, ba hapoh ka jingialam u Myntri Rangbah bad u Symbud Myntri Rangbah, ki pulit ka jylla kila leh ia ka kam kaba khraw ha kaban lap ia ka jingshisha halor katei ka jingjia kaba la ialam ruh sha ka jingshah kem jong ki 3 ngut kiba la suba hakhmat eh ha ka jingpyniap ia u Raja Raghuvanshi.
U Bah Nongkhlaw ula pynpaw ia ka jingsngewlem ia ki bahaiing bahasem jong uba la khlad noh bad ong, “Na ka NPYF ngi phah ia ka jingsngewlem sha ki bahaiing bahasem jongu (L) Raju Raghuvanshi”.
Ula bynrap ba ka long ka jingjia kaba sngewsih ba ha ka por ba dang pynlong ia ka jingwad, ki katto katne ki National Media kila kynthoh tyngeh khlem da tip ia ka jingshisha halor katei ka jingjia.
“Ka rukom leh jong ki katto katne ki National Media kala pynmih ia ka jingsngew syier ia kito ki briew kiba sah shabar jong ka jylla Meghalaya, khamtam eh ia kito kiba sah ha Sohra. Lada phi lah ban kynthoh ne leh ia kano kano khlem ka jingshisha, ngi kyntu ia phi ruh ba phi dei ban nud ban pan map na ki paidbah ka Meghalaya khamtam eh na ki paidbah ka Sohra” ula bynrap.
