Shillong, Jylliew 5: U Nongialam ka National People Party bad Myntri Sorkar Rakkam A Sangma u la ong ba ka party kala pynkhreh bha na ka bynta ka election MDC sha ka iingdorbar jong ka Garo Hills Autonomous District Council (GHADC).
“Hapoh ka jingialam jong u Myntri Rangbah jong ngi, party kala long kaba la khreh ban ia mih madan na ka bynta ka election MDC sha GHADC,” ong u Sangma.
“Ngi tip bha ha kaba iadei bad ka lympung ha ka sain hima sima hapoh ka jylla. Ngin buh ia ki rangialehkai katkum ka jinglong jong ka madan ialehkai,” u la ong.
Haba pdiang sngewbha ia ka liang pyrshah ka Voice of the People Party (VPP) kaba la shim ia ka rai ban pynieng kyrtong ha ka election MDC sha ka iing dorbar jong ka GHADC, une u nongialam ka NPP u la ong lada ki kwah ba ka party kan long jong ka jylla baroh kawei, ki dei ban poi lut sha ki jaka ba kyndong kynshrot jong ka jylla.
