Shillong, Jylliew 02: Ka jingwad ia ki shikurim ba dang shu dep iathoh-u Raja bad Sonam Raghuvanshi na Indore kala poi sha ka sngi ba 10 hynne ka sngi bad haduh mynta ym pat shym la lapdien satia ia ki.
Ha ka jingkyrpad hynne ka sngi U Blei, u Vinit Raghuvanshi, hynmen u Raja, ula kyrpad ia u Myntri Rangbah ka Jylla Conrad K Sangma ban shah ia ki Pulit ka Delhi bad ki bor shipai ba kin wan iadon bynta lang ha ka jingtohkit bad ka jingwad ia kine ki shikurim.
U Raja Raghuwanshi (30) bad Sonam Raghuwanshi (27), ki shikurim ba na Indore, Madhyra Pradesh, kila jah rngai ha Sohra naduh ka 23 tarik Jymmang. Kila wankai sha Sohra ban leh honeymone hynrei kila jah rngai bad ym lapdien shuh iaki.
Ha ka jingkyrpad, u Vinit ula kyrpad ia u Myntri Rangbah ka Jylla ban shah ia ki Pulit na Delhi bad ki BSF bad ki shipai ba kin iadonlang ha ka jingiawad ia kine ki arngut. Haba pynpaw ia ka jingbym sngewhun ia ka jingwad jong ki Pulit ka Jylla Meghalaya namar ka jingbym lah ban leh eiei la10 sngi, u ngeit ba da ka jingiadonlang ki bor shipai kan nang pynjanai ia ka jingwad bad kyrmen ruh ba kan seisoh kham kloi.
Ka rukom leh jong ki pulit ka jylla ha ka jingpynlong ia ka jingwad, ka long ba kila shim palat ia ka por bad kin dang shim por shuh shuh ban pynmih ia kano ka resol. Nga ngeit skhem ba lada ym wanrah lang ia ki shipai, kin ym lah ban lap eiei” ula kdew.
Ha ka taiew kaba la dep, u Myntri Rangbah ka jylla u Conrad Sangma ula pynthikna ba ka sorkar kan trei borbah ha ka jingwad ban lap ia kitei ki shijur bad ula ong ba ula khmih hi dalade ia katei ka jingpynlong ia ka jingleit wad. Ka kynhun kaba don 50 ki briew kaba kynthup ia ki pulit ka jylla SDRF, ki trai shnong, ki Drone bad ka K9 Unit, kila bteng ban leit wad ia kitei ki shijur wat hapdeng jong ka jingpynthud jong ka suinbneng bad ka jinglong riat jong ki jaka.
U Raja (30) bad ka Sonam (27) kila poi ha Sohra da kawei ka thuk thuk kaba kila shim wai ha ka 22 tarik u Jymmang bad kila leit iaid da ka kjat sha Double Decker Living Root Bridge ha ka shnong Nongriat ia kaba la synran ia ki da uwei u nongialam lynti u Bha Wansai. Kila sah shi miet ha Shipara Homestay ha Nongriat bad kila mih noh ha ka por 6 baje mynstep ha ka 23 tarik u Jymmang hynrei kim shym la wanphai sha Mawlakhiat.
Hynrei ym shim la don pat ban iohi ba kine ki shijur kin iaid kjat na Nongriat ban leit sha Mawlakhiat ne ban leit shim ia ka thuk thuk kaba don ha ka jaka pynieng kali ha Mawlakhiat wat hapdeng ka jingjur jong ki kam ki jam kiba iadei bad ka kam jngohkai. Ha ka 24 tarik u Jymmang ha ka por 9 baje mynmiet, u Sordar jongka Sohrarim ula pyntip shaphang ka thuk thuk kaba la shu ieh ha katei ka shnong bad ha ka jingbuddien la ioh jingtip shaphang kitei ki shijur lyngba ka ER-Challan ha ka 25 tarik u Jymmang ha ka por 2:30 mynsngi. Ki bahaiing bahasem kila ujor da ka ejahar halor ka jingjah ka jongki bad la rejistar ia kane ka ejahar, la ong u ADC ka Sohra.
Kham hashwa, ha ka 22 tarik u Jymmang kine ki shijur kila leit rung nyngkong ha Manha Homestay ha Saitsohpen, Sohra ha kaba kila buh ia ki tiar ki tar ki jongki namar ka jingbym ioh jaka sah shuh bad na ka jingjur slap, ha kaba kila ai ruh ia ka kyrteng bad phone number, hynrei la ioh jingtip pat hadien, ba kine kila leit sha Nongriat.
Hynrei namar ka jingjur slap palat ha ka jylla khamtam eh ha Sohra kaba la ju tip kum ka jaka kaba jur slap tam ha ka pyrthei, kane kala buh ha ka jingeh ia ki kynhun ban iaid shakhmat, ne ban leit rung sha ki khlaw ki btap, shajan ki wahduid bad ki jaka iad kjat (trekking) kiba don ha kylleng.
