Nongpoh, Jymmang 31 : Ka surok National Highway-6 kala satah bad jyrsieh da ka ktieh khyndew ha ka thain Jorabat hadien ka jingrngad noh ka um ba shlei na ka jingther u lapbah bad la shem ba kane ka khyndew ka dei kaba wan tuid na kawei ka jaka ba tih ia u lum ha ka thain.
U lapbah ula la ther ha kine ki laisngi duna, ula rong lut ia ka khyndew kaba la tih da ki riew shimet na uwei u lum uba don ha Jorabat bad leit lang sha ki surok bad ki lynti iaid kjat haduh ba ki lynti kila satah bad jyrsieh da ka ktieh.
Namar kane ka jingtih khyndew, kala don ruh kawei ka Iing kaba la jan hap shapoh namar ka jingshong synjor jong ka khyndew ha kane ka jaka.
Kane ka jingeh kam long satia tang ia ki nongshongshnong hynrei wat ki nongniah kali ruh kila mad ia kajuh ka jingeh namar ka khyndew kala tap lut ia ki jaka ieng kali.
Haba ioh pdiang ia ka jingujor, ka Federation of Khasi Jaintia & Garo People (FKJGP)-Byrnihat Circle bad ka 12 Mer Unit hapoh ka jingialam u Vice President Debose Chyne, kila leit jurip ia ka thain bad iakynduh ia ki nongshongshnong haba pyrshang ruh ban iakynduh ia ki briew kiba tih khyndew bad pynbthei maw ha kane ka jaka.
Hynrei namar ba kine ki nongtih khyndew kim wan poi satia, ka seng FKJGP da ka jingbitar, kala khang tala syndon ia ka khyrdop ban rung sha kane ka jaka tih lum. Kala byrngem ruh ba kine ki nongtih khyndew kim dei satia ban pynpait ia ka tala ne rung jubor katba kim pat wan iakynduh ia ka seng ban iakren shai.
Ka FKJGP kala pynpaw ba kine ki briew ki dei ban siew ia ka bai lutksan ia kito ki longiing kiba shah ktah na kane ka jingtih khyndew pathar jong ki.
