Shillong, Jymmang 31 : Sa san ngut ki briew kila iap na ki jingjia kiba la wanrah da ka jinglynshop ka lyiur ha Jylla ba kynthup ia lai ngut ki khynnah ba dang hapoh 14 snem bad uwei u rangbah ba 36 snem.
Arngut na kine ki khynnah kila iap na ka jingshah pom pyrthat kaba la jia ha West Garo Hills hynne ka sngi Saitjain. Kine ki dei ki khynnah kynthei ba kyrteng I heprit Batgrikche A Sangma ba 7snem bad I Brime D Sangma ba 13 snem.
Uwei u heprit Mebanskhem Mukhim ba 14 snem ba na Kharang, Mynkynrew C&RD Block ula khlad na ka jingshah ban ha uwei u dieng uba la khyllem na ka jingkhyrwait ka lyer.
Arngut ki rangbah kila iap ngam jyllop ba kynthup ia u Epish N. Sangma, ba 26 snem uba la ngam jyllop ha wah Gijang (Singra ) ha shnong Maspara kaba hap ha Rambrai-Jyrngam constituency, katba u dang khwai dohkha.
Uwei pat u dei u Bah Nicholas Kharpran ba 36 snem ka rta, ba na ka shnong Kyrdeng, Bhoirymbong, uba la ngam jyllop hapoh ka wah Umlew hapoh ka shnong Mawkduk.
Ka jingiap jong ki briew na ka jinglynshop ka lyiur ha Jylla kala kot sha ka 7 ngut baroh lang bad kiba mynsaw ki long 4 ngut.
Haduh 43 tylli ki Shnong ha ki 23 tylli ki Block ha kylleng ki District ka Jylla, kila shah ktah ha une u lapbah bad ka lyer kiba la lynshop ia ka Jylla naduh ka 29 haduh 31 tarik Jymmang bad ki nongshongshnong kiba la shah ktah kila kot ia ka 1094 ngut.
Ki iing kiba la shah pynjulor kila kot ia ka 28 tylli bad ki jingtei kiba la julor ki don haduh 33 tylli.
