Shillong, Jylliew 01 : U Deputy Commissioner ka West Jaintia Hills Abhinav Kumar Singh, ula pynmih ia ka hukum ba bthah ban khang khyrdep shuwa ia baroh ki jaka jngohkai pyrthei hapoh ka District naduh ka 31 tarik Jymmang.
Kat kum ka hukum, u Deputy Commissioner ula ong ba ka jingiai bteng ka jingslap hapoh ka District ha kine ki khyndiat sngi, ka lah ban buh jingma ia ki nongwankai sha ki jaka jngohkai ha ka District, kumta ka long kaba donkam ban shim ia ki lad jingiada na ka bynta ka jingshngain jong baroh.
Ula ong ba kat kum ka kyndon 34 (m) jong ka Disaster Management Act, 2005, la pynkup bor ia u ban bthah ha kaban khang khyrdep shuwa ia baroh ki jaka jngohkai hapoh ka District.
Ula pyntip ba ka jingkhang ia ki jaka jngohkai kan treikam naduh ka 31 tarik Jymmang tad haduh ban da pynmih da kawei pat ka hukum.
