Nongstoiñ, Jymmang 26:Kumba ju leh man la u snem, ka Seng Khasi West Khasi Hills, kala pynlong ïa ka shad suk mynsiem ban ai nguh ai dem ïa u Blei Nongbuh Nongthaw ha madan jong ka shnong New Nongstoiñ.
Kane ka shad suk mysiem kala sdang ha ka por noh phai sngi haduh da pynkut. Ha katei ka shad suk mynsiem la wan ban ïashim bynta da ki rang bad ki thei sotti na ki lai tylli ki District, kata na Eastern West, South West bad West Khasi Hills.
Ha shuwa ba ka jingshad kan sdang, u Rangbah ka Seng Khasi u la duwai phirat bad ai nguh ai dem ïa u Nongthaw Nong buh uba la kyrkhu ïa ka long briew man briew ïa ka longkur long jait ban roi parum pareh ha u tnum u tyndai ha kane ka snieh pyrthei.
Ha kane ka sngi ka ksing ka dhah bad ka tangmuri kila sawa jam ban pyndep ia ka lehniam lehrukom ba la buh naduh kulong kumah. Naduh ki khynnah ba dang rit ki la ïashim bynta shitrhem ha ryngkat ki khor ki khriam jong ka riam tynrai kaba ishongkun bha.
Ha kane ka shad Suk Mynsiem, haduh 214 ngut tam ki nongshad kaba kynthup ïa ki kynthei bad Shynrang kiba mih ha lympung ban iashimbynta ha ka jingshad.
U babu P. Ryntathiang Lamphang ka Seng Khasi West Khasi Hills District, u la ïathuh ba ha kane ka jingshad ka khlem don kano kano ka jingpynthud jong u slap, wat haba u la ther khlem sangeh naduh mynnin haduh ka por 3 baje mynta ka sngi, shuwa ban pyndep ïa ka nguh ka dem jong ka seng bad mar syndep ka jingduwai hi ka suiñ bneng ka la plie ïa ka lad ban ïoh sdang ïa ka jingshad.
La ong shuh shuh ba kane ka Shad Suk Mynsiem ka dei ruh kaba 25 mynta u snem bad ka dei kaba la sdang naduh u snem 2000 bad ïa kane ka jingshad, ym shym la pynlong da kaba shu ïa mynjur shongshit ruma ne leh khlem ka nongrimhynrei, la ju duwai phirat bad da kylli pyrthew na u Kynrad u Nongbuh Nongthaw, la u shah ne em ban pynlong ïa ka jingshad, ong utei u Lamphang.
Ha kane ka sngi u bah O.Pyngrope Lamphang ka Seng Khasi Sengkmie na Shillong, u la ïoh ban pynhap ïa ka lama jong ka seng ryngkat ka jingïadonlang u bah Hainess Marbaniang Pyndap Phang ka Seng Khasi Sengkmie bad kiwei kiwei ki tymmen ki San ka seng, ryngkat ka jingïasakhi lang ruh u bah Garod LSN Dyke Deputy Commissioner ka West Khasi Hills District bad kiwei kiwei ki ophisar.
