Shillong, Jymmang 26: U Myntri Rangbah ka jylla Conrad K Sangma, hynne ka sngi Nyngkong, u la plie paidbah ia ka ophis ba thymmai jong ka Bajengdoba Block Development ha ka jingdon lang ryngkat u Myntri ka tnad C&RD u AT Mondal, u Marcuise Marak Myntri ka tnd Soil & Water Conservation, ki MLA ba kynthup ia u Marthon Sangma, Pongseng Marak bad Rupert Momin.
Haba plie ia u maw kyrteng ban plie ia ka block ba la shna thymmai ha Bajengdoba North Garo Hills, u la ong ba ka sorkar ka pyrshang katba lah ban shna ia ki jingtei kiba kongsan sha ki thain nongkyndong hapoh ka jylla.
U Conrad u la pynpaw ba 70 na ka 100 ki kam jong ka sorkar kiba trei napoh napoh ka shong ha ki block office, bad u myntri rangbah u la ong ba ki block office ki long ba donkam ban pyntrei kam ha ki thain nongkyndong ia ki kam ba bha jong ka sorkar.
Shuh shuh u Conrad u la pyntip ba ha ki por kiba la leit ki jingtei bad jingshna ha ki block office ki long kiba la jot rathai bha bad ka sorkar kala shim ia ka sienjam ban shim ia ka jingkit khlieh ban pynbha bad ruh ban kyntiew ia ki jingtei jong ki ophis ha kylleng ki jaka jong ka jylla.
“Ka long kaba donkam ba ia ki jingtei ba thymmai jong ki ophis kan lah ban pyndep ia ki kam jong ki ophisar bad kidei ban pynsuk ha kaba iadei bad ka jingai jingshakri ia ki paidbah” ong u Conrad.
Shuh shuh u Conrad u la pyntip ba ka sorkar kala mang haduh 120 klur ban kyntiew lane pynbha ia ki Block ophis ha kylleng ki jaka jong ka jylla. U Conrad u la pyntip ba ka rai ban thaw ym duna ia ka 10 tylli ki C&RD block thymmai ki dang iaid shaphrang hapoh ka jingbishar bniah ka sorkar.
“Ka mat ba kongsan tam jong ka sorkar ka long ban ai jingshakri ïa ki paidbah bad lyngba kane ka ophis jong ki block, ka sorkar ka kwah ban pynthikna ba ka jingai jingshakri paidbah kan long kaba suk ba kin ïoh” ong u Conrad.
