Shillong, Jymmang 19 : U Myntri Rangbah ka Jylla Conrad K Sangma ha ka sngi Nyngkong, ula pyntip ba ka Sorkar Jylla kan sa pynkhreh shen ia ka master plan ban pynitynnad (beautification) bad shna pynbha ia ka Iewduh, kaba dei kawei na ki Iew bala rim duh hapoh ka Jylla.
U Conrad ula pynbna ia kane hadien ka jingleit jurip ia ka Iew, ia kaba la syndan lang da u Symbud Myntri Rangbah Bah Prestone Tynsong, u Myntri kam jngohkai Bah Paul Lyngdoh, ki Ophisar na ki Tnad bapheer bapher bad ki Nongmihkhmat ka Hima Mylliem.
Mynta, ka Sorkar kala mang ia ka pisa kaba kot T, 6 klur ban shna pynbha ia baroh ki lynti iaid kjat kiba don hapoh kane ka Iew.
“Ngi iohi ba ki dang don shibun ki kam kiba hap ban leh bad kumta, mynta ngin sa pynkhreh ia ka master plan ban peit kumnp ba ngin lah ban pynbha bad pynitynnad ia ka Iewduh” ong u Conrad haba iakren bad ki nongthoh khubor hadien ka jingjurip.
“Ngi don ka jingsngewkhia halor kane namar jan kot shilak ngut ki briew ki im jakpoh bad shaniah ha ka Iewduh. Kumta, ka long kaba kongsan ia ngi ban pynthikna ba ngin kyntiew ia kane ka Iew” ula ong.
U Conrad ula pyntip ruh ba ka Sorkar kala dep ban mang T. 6 klur, ia kaba ka kam kala iaid shakhmat mynta. “Phi lah ban iohi ia ki lynti iaid kjat kiba la dep maramot bad la pynkylla ia ki sha ka lynti iaid kjat ba siang da ki maw ban i kum ki lynti iaid ba wan dur tynrai” ula ong.
Ha kajuh ka por, u Myntri Rangbah ula pynbna ia ka rai jong ka Sorkar ban mang shuh shuh ia ka pisa ba T. 15 klur ha kaban pyntrei ia ki project ba kham heh kum ki lynti iaid kjat, ki nala, ka jingtep ia ki pipe um bad kiwei kiwei.
“Kine ki kam ki donkam ban leh ha ka rukom kaba heh. Kumta, kan ym don kano kano ka jingiatakhuh (bad ka project pynitynnad jong ka KHADC)” ula ong.
“Ngin pyrshang ban pynitynnad ia kane ka jaka. Hooid, kane kam pat biang satia hynrei ka jingthmu jong ngi mynta ka sngi ka long ban iohi sa ia kiei kiba donkam ban leh bad ngi shem ba ki don shibun ki jingeh ba iadei bad ka jingtuid ka um, bad ki nala-kumta ia kine yn sa kynthup lang ha ka wat kaba ar, kaba na ka project ba T.15 klur” ula ong.
U bynrap “Ha ka wat kaba ar, ngi khmih lynti ba ngin sa lah ban khot tender noh kham kloi bad nga kyrpang ba ha ki khyndiat bnai ban wan, ngi lah ban khmih lynti ia katto katne ki kam ba kin sdang-namar jong u slap bad kiwei kiwei, ngi lah ban nym lah ban pyniaid wut wut ia ki kam hynrei kan ym shimpor slem, kan sa urlong noh shen”.
Haba kylli, u Conrad ula ong “Ngi la buh ia ka project jong ka Iewduh hapoh ka NEC scheme bad katto katne ka pisa kala wan lyngba ka NEC bad katto katne yn sa bei da ka Sorkar Jylla bad lashai lashai lada donkam ia ki jingtei kiba heh, ngin sa nang wad ia ki lad ban ioh ia ka pisa”.
U Conrad ula shim ruh ia ka lad ban iakren iakhana bad ki nongshong dukan madan, ki nongrep bad ki nongshongdukan ha Iew haba pynpaw “Ngi la ioh ia ki jingai jingmut kiba sngewtynnad bha bad ngi la buh jingthoh ia ki”.
“Ka dei ka jingwan iuhkjat kaba biang bha bad ngi kular ia ki paidbah khamtam ka Hima Mylliem, ki nongshong dukan bad ki khlieh nongsynshar ba ngin iatreilang ryngkat ryngkat bad ki ban pynthikna ba ngin lah ban pynitynnad bad pynbha ia ka iewduh” ula bynrap.
 bad shna pynbha ia ka Iewduh, kaba dei kawei na ki Iew bala rim duh hapoh ka Jylla.){kind=link}