Nongpoh, Jymmang 17: Ka kynhun jong ki Shipai ba la shongthait, kiba don ha ka kynhun kaba la tip kum ka Hynniew Trep Meghalaya Ex-Services League, mynta ka sngi ki la ïoh ban pynthymmai ba pynskhem ia ki nongkitkam ka Ri Bhoi Unit na bynta ka samoi treikam jong u snem 2025 haduh u 2028.
Ia katei ka jingialang pynskhem ia ki nongialam la pynlong ha Auditorium Hall ha Marngar, ha kaba nalor ka jingdon ki Shipai ba la shongthait, la sakhi ruh da ka jingdon ki Tnga jong kito ki Shipai ba la khlad bad kiba haiing ruh kumjuh.
Ia ki nongkitkam ba thymmai jong ka Hynniew Trep Meghalaya Ex-Services League, Ri Bhoi Unit, la wan ban pynskhem da u President Bah S. Syiemlieh, President bad u Bah B. Marchyang, kiba dei ki nongialam ka Hynniew Trep Meghalaya Ex-Services League, Central Body.
Ha kane ka jingialang, la jied ia u Bah S. Thangkhiew, kum u President bad u Bah Niren Pambah, kum u General Secretary ka Ri-Bhoi Unit lem bad kiwei pat ki nongkitkam bahakhmat jong katei ka kynhun.
