Shillong, Jymmang 17 : Ka Jaintia National Council (JNC), Western Zone ha ka sngi Saitjain kala dawa ia ka Sorkar Jylla ban pyndep noh kham kloi ia ka surok ba 21 Km na Raliang sha Sahsniang, West Jaintia Hills, kaba la pyntrei na ka PMGSY-III.
Kane ka jingdawa kala mih hadien ka jingleit jurip ia ka surok.
Ka JNC-WZ bala ialam da u President Hamehi Baman kala shem ba tang 2 Km jong ka surok na Raliang sha Laskein, dang lah ban pyndep haduh mynta.
Haba iaroh ia ka jingpyrshang ka Sorkar ban kyntiew ia ka roi ka par, ka JNC kala pynpaw pat ia ka jingsngewkhia halor ka jingtrei bha ia ka surok.
Kane ka surok ba thymmai, kala jot tang khyndat por hadien ba pyndep trei da u Contractor, kala ong.
Ka JNC kala ong “Ha ka jingjurip, la shem ba wat ki bynta jong ka surok kiba la dep ban siang rong, kila khoh bad donkam ban maramot biang ia ki”.
“Ka JNC ka dawa jur ia ka Sorkar Jylla bad ia ka kompani ba pyntrei ia ka kam ba kin leh eiei noh mardor halor kane bad ban pynthikna ba la pyntrei bha ia ka surok” kala ong.
