Shillong, Jymmang 14: U Myntri Rangbah ka Jylla hynne ka sngi Balang, ula pynbna ba ka jingpynlong ia ka 39th National Games ha Meghalaya kan dei ka lympung ba khlem pyndonkam satia ia ka plastik hynrei yn pyndonkam da ki tiar ki tar kiba lah ban pynkylla sboh biang ne ka ‘Biodegradable’ National Games.
Kane ka jingkular kadei kaba la pynpaw ha ka jingai jingkren kaba dang shen da u Myntri Rangbah, uba la pynpaw ia ka jingsngewkmen ia kane ka jingmih halor ka jingpyrshang jong ka jylla ban iakhun pyrshah ia ki niut plastik hapoh ka Nongpiyur Government LP School.
U Myntri Rangbah ula leit jurip ia ki skul bad ia katei ka thain ha kaba la tei ia ka painkhana kaba la shna da ki nuit ki nier kiba la tam na ki plastik lyngba ka S.U.P.E.R CAMPAIGN 2024 (Single Use Plastic Eco Recycling) kaba la lamkhmat da ka My Meghalaya My Pride & Green Ammo ha ryngkat ka jingiatreilang bad ka Directorate of School Education & Literacy bad State Project Office SEMAM-Samagra Shiksha jong ka Sorkar Meghalaya.
U Myntri Rangbah ula pynbna ia ka jingkynshew tyngka kaba kot T.1890 Klur na ka bynta ka state-of-the-art factory kaban pynmih ia ki pla bad ki bilor na ki jingthung. Kane ka sienjam kadei da ka jingthmu ban mih bujli ia ki plastic, ka sienjam ban ialeh ban pynneh pynsah ia ka mariang.
“Ka thong ka jong nga, ka long ban pynlong ia ka National Games ka bym pyndonkam plastic ne kaba long pura kum ka ‘Biodegradable’,” ong u Myntri Rangbah bad ka banjur ia ka jingdonkam kyrkieh bad ia ka jingkongsan jong kane ka sienjam.
Ka National Games kaban sa wan ka long ka khyllipmat kaba kongsan bha ia ka jingkular ka jylla Meghalaya ban shim ia ka jingkitkhlieh ha kaba iadei bad ka mariang. Da kaba bei tyngka ha ki lad Biodegradable bad jingkyrshan ia ki lad ban tylliat bad pyndonkam biang ia ki niut ki nier, ka jylla ym tang ba ka don ia ka thong ban pynlong ia katei ka lympung ialehkai kaba jop hynrei kan pynmih ia ka nuksa ha ka ri baroh kawei ban pdiang ia ki lad ban pynneh pynsah.
Ka Kompani kaba donbynta kala pynlong ia ka jingjurip bad ka thrang ban tei ia ka karkhana ha Meghalaya bad pan ia ka jingkyrshan na ka sorkar Jylla- ka project kaba u Myntri Rangbah u thrang naduh dohnud. Kane ka sienjam kan pynlong ia ka jylla Meghalaya kum ka jylla kaba sdang nyngkong eh ha kaban shim ia kum katei ki sienjam.
Haba pdiang, ba kan long kaba eh shibun ban khang pyndonkam beit ia baroh ki plastic, hynrei kan pyniar pat sha ka jingpyndonkam ia ki pla sha ki jingsong ia ki chips bad chocolate, u Myntri Rangbah ula banjur ban iaid ha ka lynti ha ki wat bapher bad ka pynpaw ia ka jingdonkam ia ka imlang sahlang ban iadonbynta lang bad ki sienjam kiba la shim da ka sorkar.
Haba bynrap halor katei ha kaba iadei bad ka Meghalaya kaba jyrngam, u Nicholas Kharkamni na ka Super Campaign, Meghalaya Shillong, ula pyni bad ai jingbatai halor ka project kaba pynleit jingmut ha kaban tylliat bad pyndonkam biang ia ki plastic hapoh ki skul. Ha kane ka sienjam kaba kyrpang ka kynthup ia ka jinglum ia ki plastic ban tei ia ki jingtei kum ki painkhana, ka jingpyni kumno ban pyniaid ia ki kam ha kaba iadei bad ka jinglum ia ki niut ki nier bad ban kyntiew ia ka koit ka khiah bad ia ka jingshngain. U Myntri Rangbah ula iaroh ia kane ka sienjam bad ai jingithuh ia kane ka jingnoh synniang sha ka mariang bad ia ka bha ka miat jong ka imlang sahlang.
Ha kane ka jingialang la iadonlang u MLA barim uba long ruh u Nongaibuit ka sorkar jylla u Bah Hamlet Dohling, u Director of School Education and Literacy bah J.A Marvin, Sub Divisional School Education Officer, Headmaster bad ki nonghikai jongka Nongpyiur Government Lower Primary School.
U Myntri Rangbah ula ai ruh ia ka jingkular ban pynthied ia ki tiar tem tiar put na ka bynta kane ka skul.
