Guwahati, Jymmang 10: Ka Sorkar Assam ka la pyntreikam da u helpline number ban iarap ia ki samla pule ka Jylla kiba pule ha kylleng ki jaka jong ka ri India ban ioh jingiarap na kino kino ki jingeh kiba ki lah ban iakynduh.
Ki samla pule na Assam mynta ki lah ban leit mih sha ka Assam Bhawan ha New Delhi ban ioh jingiarap bad ki lah ruh ban Phone haki Helpline number ba la ai da ka Sorkar Jylla kiba treikam 24×7.
Ka Sorkar kala thung ruh ia u Ranadip Kumar Dam, ACS, Joint Secretary, GAD & OSD, bad u Vinod Kalita, House Manager jong ka Assam Bhawan, New Delhi na ka bynta ban iarap ia ki samla pule kiba donkam jingiarap.
Ki samla pule ki lah ban phone ha ki number 9874355305 bad 8920570507 ban ioh jingiarap.
Nalor kata, la buh ruh ia ka Helpline number ban pynthikna ba ki samla pule kin ioh jingiarap ha ka por ba ki don ha ki jingeh daka ba Phone haki number 011-23010298 bad 26877111.
Kane ka jingthmu jong ka sorkar Assam ka long ban pynthikna ia ka jingshngain bad jingbha jingmiat jong ki samla pule kiba sah sha jngai na la iing, ban ai ia ki ka lad kaba lah ban shaniah ban ioh jingiarap ha kano kano ka por ba ki donkam.
Hadien ba la nang jur ka thma hapdeng ka India bad ka Pakistan, ka Sorkar Assam ka la shim ia kane ka sienjam na ka bynta ka jingwanphai suk jong ki samla pule kiba pule ha kylleng ki Jylla ka Ri India.
