Shillong, Jymmang 08 :Ka Sorkar Meghalaya kala pynjari da ka korphiw miet kat kum ka kyndon 163 BNSS ha ki jaka khappud ka Jylla bad ka Bangladesh ban tehlakam ia ka jingrung jingmih ki briew kynthup ki riewkiengatiar bad ki nongkhaii tuh.
Kane ka jingpynjari kala jia ruh hapdeng ka jingkyan jong ka thma hapdeng ka India bad Pakistan-hadien ba ka India kala ther namding ia ki ktem jong ki lehnoh Laskar e-Taiba bad Jaish-2-Mohammed ha Pakistan bad Pakistan-occupied Kashmir (PoK) ban kput ia ka jingthombor ha Pahalgam, kaba la shim ia ka mynsiem ki 26 ngut ki nongshangkai pyrthei.
Kat kum ka hukum bala pynmih da ki Deputy Commissioner ka West Jaintia Hills, kane ka korphiw miet kan treikam mardor naduh ka por 8 baje mynmiet haduh 6 baje mynstep ha ki jaka ba haduh 200 meter na u Zero Line.
Ha East Khasi Hills, kane ka korphiw kan treikam naduh ka por 8 baje mynmiet haduh 6 baje mynstep ha ki jaka ba hapoh ka 1 Km radius na u zero line bad kan treikam haduh 2 bnai kynthih.
Kine ki DC kila ong ba ki jaka khappud ka WJH bad EJH namar ba bun ki dei ki bym pat ker sainar, ka dei kaba suk bha ban rung tuh da ki briew na Bangladesh, ki dkhot jong ki runar kiba don jingiadei bad ki riewkiengatiar bad ki kynhun lehnoh, kiba lah ban ialum bun briew hajan ki jaka khappud ha ka por mynmiet ban leh ia ki kam bymman.
Kat kum kine ki hukum, la khang pyrshah ia ka jingiaid ki briw ha ki jaka khappud bad ka Bangladesh da ka jingthmu ban jam sha shiliang u pud ne rung tuh sha Ri India.
La khang pyrshah ruh ban ialum briew ba 5 ngut ne palat bad ban rah ia ki tiar pynmynsaw kiba lah ban pyndonkam kum ki tiar ialeh ba kynthup ia ki dieng, ki maw ha ki jaka khappud ka India-Bangladesh.
La khang pyrshah ruh ia kino kino ki kam beain, ka jingkhaii tuh ia ki masi, ki mar ki mata, khaii kwai, tympew, kha thad, biri, cigarette, sla sla bad kiwei kiwei.
