Shillong, Jymmang 05: Ka Hynniewtrep Youth Council (HYC) hynne ka sngi Nyngkong kala dawa na ka sorkar jylla ba kadei ban kynthup lang ia ka seng ha kano kano ka jingkhot iakren ha kaba iadei bad ka jingthungkam thungjam hapoh jong ka North Eastern Indira Gandhi Regional Institute of Health & Medical Sciences (NEIGRIHMS).
Kane ka jingdawa kala mih kadei hadien ba ka HYC kam shym la shah khot sha ka jingialang kaba la lum da uMyntri ka Sorkar jylla u Bah Paul Lyngdoh ha kaba la iadonlang ki bor pyniaid jong ka NEIGRIHMS bad ki nongialam jong ka Khasi Students’ Union (KSU).
Ha ka shithi kaba la phah sha u Bah Paul Lyngdoh, u President ka HYC u Roykupar Synrem ula ong ba ka HYC kala phah ia ka dorkhas sha ka Deputy Director ka NEIGRIHMS ha ka 24 tarik u Lber ban pynpaw ia ka jingsngewkhia ha kaba iadei bad ka rukom thungkam.
“Ngi lah pynlong ruh iaka jingiakhih halor ka jingleh kuman jong ka NEIGRIHMS ban shimkhia ia ki jingsngewkhia ki jong ngi na ka bynta ka bha ka miat jong ki samla trai ri bad ia baroh ki nongshong shnong. Kumta ngi kyntu ia phi, ban shimkhia lem ia ki jingpynsngew ki jong ngi bad ban kynthup lang ia ka seng jong ngi ha ki jingialang ne jingiakren bad ki bor kiba dei khmih ban pynbeit ia ki kam ki jam kiba iadei bad ka rukom thungkam hapoh ka NEIGRIHMS,” ula ong.
