Nongpoh, May 5: Haduh 23 ngut ki samla na ki District bapher bapher ka Jylla kila pyndep ia ka jinghikai pyntbit ba artaiew ban shna jingshna da ki siej ha ka prokram bala pynlong ha North East Cane and Bamboo Development Council (NECBDC), Byrnihat, Assam hynne ka sngi Nyngkong.
Ka jinghikai pyntbit bala ai kyrteng “Executive Course on Bamboo Handicrafts & Utility Products Making”, la pynlong hapoh ka “Raising and Accelerating MSME Performance (RAMP)” scheme jong ka Tnad Commerce & Industries, ka Sorkar Meghalaya, ha ryngkat ka jingiatreilang bad ka NECBDC.
Kane ka prokram kala sdang naduh ka 21 tarik u Iaiong bad la pynkut noh hynne ka sngi Nyngkong.
Ha kine ki ar taiew jong ka jingai jinghikai, ki nongiashimbynta ki la ioh jinghikai ban pyntbit shuh shuh ban shna ne thain ia ki shylliah, ki shang, ki kriah, ki jingdeng bapher bapher bad kiwei kiwei da kaba pyndonkam beit da ki siej bad kiwei ki tiar.
Ka NECBDC bad ka tnad DCIC ki la pynkup burom ruh ia baroh 23 ngut ki samla kiba la pyndep ia kane ka training ha ka program kaba la long hynne ka sngi, ka ba la wan iashimbynta da u M.C. Omi Ningshen (IRS-IT), Managing Director ka NECBDC, u Bah D.M. Sun, Functional Manager, District Commerce and Industries Centre (DCIC), Ri Bhoi District nalor kiwei kiwei ki ophisar.
Haba kren ha kane ka program, u MC Ningshen u la ai ka jingiaroh ia kine ki tnad treikam ba la lah ban pynlong ia kane ka program ai jinghikai kaba jop bad kaba la pynmyntoi ia ki nongiashimbynta kaba long ruh ka thong jong ka sorkar ban pyntbit ia ki samla kiba donsap bad ba kin lah ban ieng ha la ki jong ki kjat ban kamai ia la ka jakpoh lyngba kane ka kam shna bad thain lyngba ki siej.
U la kyntu ruh ia baroh ki 23 ngut ki samla kiba la pyndep ia kane ka training ba kin pyndonkam hok ia la ka sap bad ia ki lad jinghikai ba ki la ioh khnang ba kin lah pat ban kiew ha ka liang ka kamai kajih ha ki shnong ki thaw jong ki.
Kane ka sienjam ban pyntbit ia ki samla kiba donsap ka dei ka thong jong ka sorkar ban nang pynjanai ia ka sap jong ki samla ba kin lah ban ioh ia ka kam ka jam lajong bad ban ioh ruh ia ka kamai jakpoh ha ki shnong ki thaw kaba dei ruh ka thong jong ka scheme MSMEs ha ka jylla Meghalaya.
, Byrnihat, Assam hynne ka sngi Nyngkong.){kind=link}