Rai ka NEIGRIHMS ban pynsangeh shwa ia baroh ki jingthungkam ba iakhih ka KSU

Hapoh ka shitaiew yn iakren pynbeit ia baroh ki mat dawa

Shillong, Jymmang 05 : Ka North Eastern Indira Gandhi Regional Institute of Health & Medical Sciences (NEIGRIHMS) kala rai ban pynsangeh shwa ia baroh ki jingthungkam hapoh ka Institute bad ban pynbeit ia baroh ki kam bad ki jingdawa jong ka Khasi Students’ Union (KSU) hapoh ka shitaiew.

Ia kane la pyntip da u Myntri bad Nongaiktien ka Sorkar Bah Paul Lyngdoh hadien ba pyniaid ia ka jing ialang bad ki Ophisar ka NEIGRIHMS lem bad ki nongialam ka KSU, kaba la pynlong ia ka jingiakhih da kaba iashong kyllain mungor hapoh ka Institute, kaba la kynjoh mynta sha ka sngi ba san.

Ka KSU kala dawa ba ka NEIGRIHMS ka dei ban pyntreikam mardor ia ka bhah thungkam ba 80:20 ia ki nos kynthei bad shynrang, ban pynheh ia ka rta thungkam, ban bishar thymmai ia ka roster registry, ban buh ia ka examination centre ha Meghalaya bad kiwei kiwei.

Haba iakren bad ki nongthoh khubor, u Bah Paul ula ong “Namar kine ki jingjia bala jia, ka NEIGRIHMS kala rai ba katbym pat pynbeit ia kiei kiei baroh, ki kam kiba lah ban ktah ia ka jingthung kam thungjam, ka NEIGRIHMS kan pynsangeh shuwa ia baroh ki jingthungkam bad ngi dei ban lah pynbeit noh ia kiei kiei baroh hapoh ka shitaiew”.

“Namar kata, la kyntu ia ki nongialam ka KSU ba kin pynsangeh noh ia ka jingiashong kyllain mungor bad ka jubab ka long kaba sngewtynnad bad ki donkam ban pynskhem ia ka rai da ka General Council, ka ban sa shong jingialang mynta ne lashai ka sngi. Nga kyrmen skhem ba kan long mynta ka sngi” ula bynrap.

Nalor kane, u Bah Paul u pyntip ba ka kynhun kaba un ialam, ha ka jingbym don ka Myntri ka Koit ka Khiah, kan pan por ban iakynduh ia u Myntri ka Tnad ka Koit ka Khiah ka Sorkar Pdeng ban iakren ia ki kam, kiba long shabar ka bor jong ki nongpyniaid ka NEIGRIHMS ha kine ki khyndiat sngi ban wan.

“Kumba phi tip, ka don ruh ka Governing Council jong ka NEIGRIHMS kaba khleh da u Myntri ka Sorkar Pdeng bad ngi la rai ba ngin sa rah iakren ruh ia kine ki kam bad ka Governing Council” ula ong.

U Myntri u pyntip ba ka jingialang hapdeng ki bor pyniaid ka NEIGRIHMS bad ka KSU kan sa long lashai ka sngi ban iakren halor ki kam ba iadei bad ka roster registry.