Shillong, Jymmang 01 : Ka Jaintia National Council (JNC) kala dawa ban pynneh hajuh ia ki Pulit Home Guard trai shnong, kiba pahara ha Khliehriat Power Grid.
Ka JNC kala mih shakhmat ban buh ia kane ka jingdaw hadien ba 9 ngut ki Home Guard trai Shnong, kiba la shakri hapdeng 10-15 snem ha ka Tnad, kila shah weng noh na kane ka Grid.
Ka JNC hapoh ka jingialam u President Sambormi Lyngdoh bad ka Employment Commission, kala leit iakynduh ia u Chief Manager ka Power Grid Sanatanu Das ban ioh jingshai halor kane ka rai.
La iathuh ba u Das ula batai ba ka jingweng noh ia kine ki Pulit Home Guard ka dei kaba la pynshong nongrim na ka jingpynbna (notification) ka Sorkar Jylla, kaba pynpaw ba ia ki Home Guard yn bujli noh da I Pulit na ki bor pahara ka Sorkar Pdeng.
Halor kane,u President ka JNC ula pynrem ia ka Sorkar Jylla bad ong ba ka dei ka jingpynjah burom ia ka Tnad Civil Defence. Ula buh jingkylli ia ka nongrim ban wanrah ia ki bor pahaar ba nabar haba ka Jylla kala don iala ki jong ki Home Guard bala hikai pyntbit, haba ban jur ba ia ki Home Guard ki dei kiba la shah hikai kyrteng ban trei kam hapoh ka Jylla.
La iathuh ba u Chief Manager ula pan por haduh ka 5 tarik Jymmang ban pynbeit ia kane ka kam. Ka JNC kala pynpaw ba lada kane ka jingdawa kam dei, ka seng ka lah ban shim da kiwei pat ki lynti.
Ka JNC ka don jingthmu ruh ban iakynduh ia ki Myntri Sorkar ba dei khmih ia kane ka kam haba ban jur ba ka seng kam lah pdiang ban bujli ia ki Home Guard trai shnong da ki briew ba nabar.
 kala dawa ban pynneh hajuh ia ki Pulit Home Guard trai shnong, kiba pahara ha Khliehriat Power Grid.){kind=link}