Mynjur ka Sorkar ia ka Policy die scrap ia ki kali rim | Haduh 13000 ki kali yn weng na surok ha ka wat nyngkong

Shillong, Jymmang 01 : Ka Sorkar Jylla kala ai jingmynjur ia ka policy ban die scrap ia ki kali rim (Vehicle Scrappage Policy) ha kaba haduh 13,000 tylli ki kali rim, yn sa weng noh na ki surok hapoh ka wat treikam ba nyngkong.

Ia kane ka rai la shim da ka jingialang jong ka Kynhun Myntri kaba la pyniaid da u Myntri Rangbah ka Jylla Conrad K Sangma hynne ka sngi Palei.

Haba pyntip ia kane, u Myntri bad Nongaiktien ka Sorkar MDA Bah Paul Lyngdoh ula ong “Ngin pynbeit ia kane ka kam da kaba weng shuwa nyngkong eh ia ki kali Sorkar kiba la dap 15 snem ne kham rim. Kumba, 5000 tylli ki kali Sorkar ki la hap hapoh kane ka Policy die scrap bad yn sa weng noh ia ki napoh ki surok”.

Haba iadei bad ki kali shimet, u Bah Paul ula ong “Ngin pyntreikam shuwa nyngkong ia ka Policy da kaba buh tang ia ki kali kiba la dap 35 snem lane palat, bad ki don kumba 8000 tylli kum kine ki kali”.

Ula bynrap “Baroh lang, 5000 tylli ki kali Sorkar bad 8000 tylli ki kali shimet kan long 13000 tylli ki ban sa weng noh na ki surok kat kum kane ka policy”.

Haba ban jur ia ki jingmyntoi jong kane ka policy, u Bah Paul ula ong “Ka jingmyntoi kaba khraw eh ka long ban ailad ia ka Sorkar ba kan pynduna ia ka jingpynmih tdem, pynduna ia ka jingthied umphniang kali bad pynshlur ban shna tiar da ki kali rim bala pynkylla marjot”.

U Myntri u pyntip ba ka Shillong ia mynta ka don kumba 2,76,262 tylli ki kali kiba la register haba bynrap ba kane ka sien jam ka dei kaba iasyriem bad ki sienjam bala leh ha baroh kawei ka Ri.