Shillong, Jymmang 01 : Ki Pulit ka Ri-Bhoi kila ioh ban kem ia 3 ngut ki briew kiba donkti ban tuh ia ka umphniang diesel na ki mobile tower ha ka shnong Jirang.
Ia kine ki briew la ioh ban bat da ki Pulit hynne ka step phyrngap sngi Palei ha lad PWD, Patharkhmah bad naka kali ba ki iashong, la ioh ban kurup haduh 220-230 liter ka diesel.
Kane ka diesel ka dei kaba la tuh na ki lai tylli ki mobile tower ka Reliance Jio kaba don ha ka shnong Jirang.
Kine ki lai ngut ki kyrteng u Refer Marsing na ka Mawtari Thaiang, u Robren Langi bad u Rishad Sylliang kiba dei na ka shnong Umkra.
Ki Pulit ki pyntip ba kine ki briew ki dei ruh kiba la donkti teng ha ka jingtuh ia ki umphniang na kylleng ki mobile tower kiba don hapoh ka District.
Ha ka jingtohkit, ki Pulit kila iohksai bad ithuh ruh ia ki briew kiba ju pdiang ia kine ki mar tuh bad ka jingthwet ia ki kala iaid shakhmat.
Kane ka jingiohkem ki Pulit ia kine ki nongtuh kala wan jia da ka jingai jingtip jong ki nongsakhi ia kane ka kam bymman.
