Guwahati, April 30: Ha ka jingkylla jong ka kam sain pyrthei, kumba 21 ngut ki MLA jong ka Manipur kila phah da ka jingthoh sha u Myntri Rangbah duh ka ri u Narendra Modi, ban kyntu ia ka sorkar pdeng ban thaw biang ia ka Sorkar bala jied da u paidbah hapoh ka jylla, hadien ba ka jylla kala don hapdeng ka jingshah pynjari iaka jingsynshar ka President ne President Rule naduh ka 13 tarik u Rymphang 2025.
“Ki paidbah jong ka Manipur ki pdiang ia ka jingpynjari ia ka President’s Rule da ka jingkyrmen bad jingangnud. Hynrei la jan 3 bnai, kam shym la don kano kano ka sienjam kaba paw pyrthei kaba la shim ban wanrah biang ia ka jingsuk bad ia ka shongshngain ha ka jylla” pynpaw ha ka shithi kaba la thoh da ki MLA.
Ki MLA kiba la soi ha katei ka shithi ki kynthup na ka seng Bharatiya Janata Party (BJP) bad kiwei pat ki seng sain pyrthei kiba mihkhmat bun ia ki jaidbynriew Meitei bad ki jaidbynriew Naga.
Katba ki MLA kiba dei ki Kuki-Zo kiba la dawa ban don noh ia la ka jong ka bor synshar na ka bynta ki jaka kiba bun paid da ki Kuki-Zo kim shym la treh ban soi ia katei ka shithi. Wat u Myntri Rangbah barim ka Manipur u N. Biren Singh ruh ym shim la treh ban soi ia katei ka shithi.
Ki MLA kila pynpaw ia ka jingsngewkhia halor ka jingiai bteng jong ka jingthylli ki shuki ha ka kam synshar kaba lah ban nang pyntroin shuh shuh ia ka jylla.
“Bun tylli ki kynhun sengbhalang kila mih shakhmat ban pyrshah jur ia ka jingpynjari ia ka President’s Rule. Kila dawa ba dei ban thaw beit ia ka sorkar bad kila pynlong ia ki jingailang paidbah bad ia ki Rally, da kaba kynnoh ia ki MLA kiba don ha ka Liang Synshar kila pulom ha kaban leh eiei” la pynpaw ha ka shithi.
Da kaba banjur ia ka jingdonkam kyrkieh katkum ka jinglong jingman, ki nongmihkhmat kila thoh, “Ngi sngew ba da ka jingthung biang ia ka sorkar jylla, kadei tang kane ka lad kaba lah ban wanrah ia ka jingsuk bad jingshngain bad ban pynneh ia ka jinglong jingman hapoh Manipur. Kumta ngi kyntu ia phi ban shim ia ki sienjam kiba donkam mardor na ka bynta ka bha ka miat jong ki padbah ka jylla Manipur.”
Ia katei ka shithi la phah ha ka 10 tarik u Iaiong ia kaba la ioh pdiang pat da ka ophis jong u Myntri Rangbahduh ka ri hynin ka Sngi Nyngkong, la iathuh ki tyllong khubor.
