Shillong, Iaiong 22: Da ki spah ngut ki riewngeit ka Balang Katholik hynne ka janmiet ki la ia lum lang ha ka Iingmane Mary Help of Christians Laitumkhrah ban ai burom khatduh ia u Pope Francis, uba la khlad noh ha ka Easter Monday kata haka 21 tarik Iaiong ha ka rta kaba 88 snem.
Ïa ka Requiem Mass la pynlong kum ka jingai burom khatduh ia u Pontiff uba la khlad noh, la pynlong da ki jingduwai, ki jingjaw ummat bad ki jingai khublei khatduh. “U la long u sharak jong ka jingkyrmen bad jingsuk. Ka jingkhlad noh jong u ka la iehnoh ia ka jinglong thylli, ym tang ia ki riewngeit Katholik hynrei ia ka pyrthei baroh kawei” la ong kawei napdeng kiba wan shaka Requiem Mass.
Uwei pat uba la pynpaw ia ka jingkyrmen ban ioh biang da u nongialam uba tbit, u la ong “Ngi dei ban duwai ba U Blei un phah ia ngi ia u Pope uba bha. Kum ki riewngeit Katholik ngi hap ban iai duwai”.
Kawei ka Longkmie ka la pynkynmaw ia ka khubor ba khatduh jong u Pope uba la pynksan iaka jingdonkam ban don ka jingsuk ha ka pyrthei bad ka jingsangeh iasiat haki katto katne ki bynta ka pyrthei bad kala ong “Ka jingkyrpad jong u na ka bynta ka jingsuk ka long kaba donbor haduh katta katta. Ka long kaei kaei kaba ngan ym klet satia”.
“Ngan duwai ba ki Angel kin sumar ia ka mynsiem jong u ha bneng” la ong uwei napdeng kiba wan Requiem Mass.
Ka Holy See Press Office, ka la pynbna ba ka Mass tep ïa u Pope Francis, kan long ha ka 26 tarik Iaiong 2025 ha ka por 10:00 baje mynstep ha St. Peter’s Square, Vatican City bad ka met jong u Pontiff ba la khlad noh kan don ha St. Peter’s Basilica naduh 23 Iaiong naduh ka por 9 baje mynstep.
U Cardinal Giovanni Battista Re, Dean jong ka College of Cardinals, un pyniaid ia ka Mass tep ia ka met basah jong u Pope ha kaba yn sakhi lang da ki nongialam balang na kylleng ka pyrthei.
Ïa ka Iukharist yn pynkut noh da ka Ultima commendatio bad Valedictio, kaba dei ruh ka sngi sdang jong ka por iam briew kaba khyndai sngi ia kaba la tip kum ka Novemdiales.
Ha shwa ban leit ontep, u Cardinal Kevin Farrell, u Camerlengo jong ka Holy Roman Church, un ïalam ïa ka jinglehniam katba dang rah ïa ka synduk na ka Chapel Casa Santa Marta sha St. Peter’s Basilica bad ka jingiaid paidbah kan iaid lyngba ka Santa Marta Square bad rung sha Basilica lyngba ka Central Door.
Hadien ka jinglehniam tep, yn rah ïa ka met jong u Pope Francis ban tep ha Basilica St. Mary Major.
U Pope Francis u pawnam na ka bynta ka jinglong sngew rit mynsiem bad ka jingïasaid khlem sangeh naka bynta ka jingsuk bad u la iehnoh ïa ka pateng kaba la ktah ïa ki million ngut ha kylleng ki riewngeit jong ka Pyrthei.
