Shillong Nailur 01: U Myntri Kam Pohiing ka jylla Bah Lahkmen Rymbui, u la pyntip ba ka sorkar kala ioh pdiang ia ka kaiphod jingtohkit jong ka Fact Finding Team halor ka jingkynnoh pyndonkam bakla ia u Additional Inspector General (Administration) Bah GK Iangrai iaka bor bad kala pan ruh ia ki jingpynshai halor ki katto katne ki bynta khnang ba kan ioh ban shim ia ka rai ia kaei kaba kadei ban leh nangne shakhmat.
“Ka Fact Finding Team kala dep ban aiti iaka kaiphod sha ka tnad Kam Pohiing haka 30 tarik u Nailar bad mynta ka dang khmih bniah ia katei ka kaiphod bad kala pan ruh ia ki katto katne ki jingpynshai ha kaba iadei bad katei ka kaiphod. Hadien ba ngi la ioh ia ki jingpynshai, ka sorkar kan sa leh ia kaba donkam” ong u Bah Lahkmen Rymbui hynne ka 1 tarik u Nailur.
Haba kylli la ka kaiphod ka kdew ne em ia kata ka jingkynnoh pyndonkam bakla iaka bor da u Bah GK Iangrai, u Bah Rymbui u la ong, “Ka Fact Finding kala dep ban ai ia ka kaiphod ia kaei kaba kala lap, hynrei ia mynta hi, ngi dang ap shwa ban ioh ia ki jingpynshai bad ngam pat lah ban ong la ka don ne kam don ka jingpyndonkam bakla iaka bor”.
“Hynrei tang kawei, ia ka kaiphod kaba ki aiti ngi dang pule bad ang khmih bniah bad lada don kano kano ka jingleh tam da mano re mano, ynda lah dep iit bniah, ka sorkar kan sa leh ia kaba donkam katkum ki kyndon aiñ” ula bynrap.
Halor ki jingdawa ba dei ban thung da ka jingtohkit ba pura ia kane ka jingkynnoh, u Myntri Kam Pohiing u la ong, “Ia kita baroh lah ban leh, hynrei ia mynta ngam pat lah ban ong eiei, hynrei shwa ban leh ia kano kano ka kam ngi hap ban iit bniah bad ynda la ioh iaka kaphod phin sa tip, iakaei kaba ka sorkar kan leh”.
“Ka sorkar kam kwah ban buhrieh ia kano kano ka kam lada don kiba leh tam ne duna bad yn iaid beit katkum ka aiñ hynrei ngi hap ban ai iaka lad iano iano ruh kiba shah kynnoh ba kin jubab ne ai iaka jingpynshai” ula ong.
Hato ka sorkar kan wengkam shwa shipor ia une heh pulit lada ka thung ia ka jingtohkit, u Bah Rymbui u la jubab da kaba ong “Ia mynta ngan ym pat ong eiei, hynrei ynda ngi la ioh iaka jubab baroh ngin sa peit ia kaei kaba ngi dei ban leh” bad ong, ba ka sorkar ka kwah ba kan ioh kloi ia ki jubab halor ka jingpan jingpynshai ban ioh leh ia kaba donkam.
