Shillong, Nailur 01: U Symbud Myntri Rangbah ka Jylla Bah Prestone Tynsong ula pyntip ba ka Sorkar Jylla ka dang pynkhreh mynta ban pyntreikam noh da ka jingsiew tulop manla ka lai bnai (Quarterly System) ia ki Nonghikai SSA haba kular ban pynkloi noh ha kaban siew ia ka tulop ba dang sah.
“Ka kynhun ki Nongialam ka MSSASA kala iakynduh biang hynne ka sngi ia u Symbud Myntri Rangbah. Ula pyntip ha ngi ba ki Tnad ba dei khmih (Education, Planning bad Finance) ki dang pynkhreh ia kaba donkam ban pynurlong ia kane. Ban iaid beit ka jingsiew tulop balai bnai, ka Sorkar kan hap kyntiew ruh ia ka corpus fund khnang ba kan lah pyndap ia ka jingsiew tulop ia ki Nonghikai SSA”ong u President ka MSSASA Bah Aristotle C Rymbai ha ka kyrwoh bala phah hynne ka sngi palei.
Haba iadei bad ka tulop ba dang sah, u Bah Rymbai ula ong ba u Symbud Myntri Rangbah ula pyntip ia ka Kynhun b aka Sorkar Jylla kala dep ioh iaka sanction order ban pyllait ia ka adhoc instalment bad ka bhah jong ka Installment ba nyngkong jong ka Sorkar India ka long T. 272 klur.
“Mynta ka Sorkar Jylla ka dang pynkhreh ban pyllait noh ia ka bhah jong ka Jylla kaba long T. 30.26 klur bad ruh ia ka song pisa bynrap. U La pyntip ruh ha ngi ba dalade ula tuklar ia kane ka kam ban pynthikna ia ka jingsiew noh ia baroh ka tulop ba sahteng jong ki Nonghikai SSA” ula bynrap.
Halor ka jingdawa ban pynkiew ia ka tulop ki nonghikai SSA, u Bah Rymbai ula iathuh ba u Symbud Myntri Rangbah ula ban jur ba ia kane ka kam yn sa khmih bniah da ka State Education Commission ka ban sa thaw noh shen da ka Sorkar Jylla.
