Shillong, Nailur 1 : Ka Executive Committee jong ka UDP Shillong City Youth Wing ka la jied noh da ki nongkitkam kiba thymmai ban pyntyllun ia ka kam jong ka party khamtam ha ka jingpynkhreh na ka bynta ka elekshon MLA kaban long ha u 2023.
Katei ka jingjied da ki nongialam ba thymmai kadei hadien ba ka la don ka jingresaiñ jong ki katto katne ki nongialam jong ka Youth Wing kiba dei na Mawlai constituency kiba la rai ban bud lang noh bad u MLA barim katei ka constituency, Bah Embhahlang Syiemlieh.
Kumta, halor kane, na ka liang ka Shillong CityYouth Wing ha ka jingialang kaba long hynin ka sngi ka la jied noh ia u Bah Richard Syiemlieh na West Shillong kum u President, nangta u Bah Alex Lynser na Mawlai kum u Working President nalor ki saw ngut ki Vice President.
Shwa kane ia ka kam President jong ka UDP Shillong City Youth Wing la bat da u Bah Manbhalang Syiemlieh uba la resain noh dang shen na ka kam ryngkat bad bun ki nongialam jong katei ka youth wing.
La jied ruh ia u Bah Desmond K Mawlong na Nongthymmai constituency kum u Genenral Secretary nalor ki sawngut ki Assistant General Secretary. La jied ruh ia u Bah Kersuk Cajee na Nongthymmai kum u Chief Youth Organiser nalor kiwei kiwei ki nongkitkam.
Katkum ka kyrwoh ba la phah da u bah Augusten Blah Publicity Secretary katei ka samoi treikam jong ki kan dei haduh u snem 2025.
