Nongpoh, Nailur 01: U Myntri Rangbah ka Jylla Conrad Kongkal Sangma ula kren da kaba shai kdar ba ka Sorkar Jylla kam lah shuh ban pynkylla Ïa ka Memorandum of Understanding (MoU) kaba la dep ban ïasoi hapdeng ka Assam bad Meghalaya hakhmat u Myntri kam pohiing ka Ri u Amit Shah.
Haba iakren bad ki nongthoh khubor ha Byrnihat, u Myntri Rangbsah ka Jylla ula ong “Kane kam dei ka kam khyllung khynnah ia kaba nga la dep ong naduh kaba sdang hadien ka jingsoi ia katei ka soskular”.
“Ka jingdawa ban pynkylla ne pynbeit da kumwei ia ka MoU kam idon satïa kano kano kaba i donkam kumba la dawa (Does not arise) hynrei lah ban don tang katto katne ka jingpynbeit ïa ka” ula ong.
Halor ka jingdawa ban rah iakren biang ia ki shnong ba la pynhap jubor sha Assam ha ka jingiakren pynbeit pud jong ka wat kaba ar, u Myntri Rangbah ula ong “Ia mynta hi ym pat lah ban shim rai namar hynrei ngin sa peit kat kum ka jingiaid jong ka jingiakren jong ka wat kaba ar. Kumba nga la kular, ngan sa rah iakren ia kane ka kam ha kane ka wat”.
Ha kawei pat ka liang, u Conrad K Sangma u la pyntip paidbah, ba halor ka jingdawa ban kyntiew kyrdan Civil Sub Division bad ban thaw ïa ki C&RD Block na ka liang ka sorkar jylla ka dang hap ban peit katkum ka jingdon pisa ha ka sorkar hynrei ha kaba ïa dei bad ka jingdonkam ban kyntiew kyrdan ïa ka Patharkhmah sha ka Civil Sub Division, ïa kane ka sorkar jylla kan buh hakhmat eh namar kane ka Administrative Unit ka dei kaba la dei hok ban ïoh noh ïa ka jingkyntiew kyrdan sha ka Civil Sub Division.
