Shillong, Nailur 01: Ka Khasi Students Union (KSU) Laban Circle hynne ka sngi palei kala dawa ia ka Deputy Commissioner ka East Khasi Hills Kong Isawanda Laloo ban kyndang noh ia ki bar jylla kiba sah be-ain ha Maxwellton Estate.
Ka KSU-Laban kala aiti da ka dorkhas sha ka Deputy Commission haba pynpaw ba ki don haduh 150 tam ki Longiing jong ki bar jylla kiba shu sah beain ha kane ka jaka.
“Dei ban kyndang noh ia kine ki briew ba sah be-ain shuwa ba kane ka jaka ruh kan kylla long kum ka Them Metor” ong ka KSU.
Ka Seng kala buh jingkylli ruh ba kumno kine ki briew ki ioh ban ri masi ha katei ka jaka kaba hap hapoh ka jaka Municipal kaba la khang pyrshah da ka ain.
La kynnoh ruh ba kine ki briew kila pynkylla long ia kane ka jaka kum ka ktem leh ia ki kam awria, jaka iadie iathied droks bad bun ki kam sniew ki ju jia na ka por sha ka por.
Ka KSU kala pynsngew ruh ha ka DC halor ka jingkyntur pud jong ki shipai bad kila kyntu ia ka DC ban shimkhia mardor namar ki shipai ki ju pyndik ia ka shongsuk shongsain bad iaka iaid ka ieng jong ki paidbah na ka por sha ka por.
“Ngi dawa ban weng noh ia ki jingthoh ‘Defence Land’ ne jaka shipai ha ki surok bad jaka kiba dei jongka tnad PWD bad ki riew shimet” kila ong.
Ki nongialam ka KSU kila iathuh ba ka DC kala kular ban shimkhia bad ban bthah ia ki bor pyniaid ban leh ia kaba donkam.
