Shillong, Iaiong 11: Ka kynhun ialehkai Cricket ka Meghalaya hynne ka sngi Thohdieng kala pynrem ia ka Manipur da 8 run ha ka jingiakhun ia ka semi-final jong ka 2nd NECDC Senior Women’s Inter State Tournament bad ka Meghalaya mynta kan iakhun pyrshah ia ka Sikkim ha ka Final.
Ka Meghalaya kaba la leit ban tied nyngkong kala kamai 109 bad hap 7 wiket ha ka 20 over.
Ka Luiza Tamang kala kamai 49 run, katba ka Daiaka Emigale Warjri kala kamai 27 run.
Ki nongkawang bol ka Manipur, kaba kynthup ia ka kapten ka R.K. Linthoingambi Devi, Monica Devi Ningthoujam bad Ranjita Devi Koijam kila ioh khur mar 2 wiket.
Haba ka Manipur kala leit ban tied baar, kala kamai 101 run bad hap 7 wiket bad kala duna noh da 9 run ban khur ia ka jingjop.
Ka Seterny Devi Brahmacharimayum kadei kaba la kamai bun ruh eh ia ka Manipur bad kala kamai marwei 45 run.
Ki nongkawang bol ka Meghalaya khamtam ka ‘Player of the Match’ ka Rubi Chettri, kala ioh khur 2 wiket bad ai tang 14 run.
Da kane ka jingjop, ka Meghalaya kala ioh rung sha ka Final bad kan iakhun pyrshah ia ka Sikkim ban ia knieh ia ka nam lahduh bad kane ka jingiakhun kan long ha ka sngi Saitjain ha ka por 9:30 mynstep.
Ia kane ka jingialehkai ia ka Final yn pyni live ha ka YouTube channel jongka Sikkim Cricket Association bad ha ka CricHeroes.
