Dimapur, Nailur 01 : Ha ryngkat kiwei pat ki jylla kiba ka seng National People’s Party (NPP) ka don ia ki ktem ba khlain jong ka, ka seng NPP ha Nagaland kala rakhe ia ka jingdap 10 snem jong ka hajan Morung Express House, Duncan Bosti, Dimapur hynne ka sngi Palei.
Kane ka jingdap shiphew snem ka iatyngkhuh ruh bad ka jingrakhe ia ka lyngkhuh sngi kha kaba 75 jong u nongseng jong kane ka party u Late Purno Agitok Sangma ia uba la tip bha kum u P.A. Sangma.
Ia kane ka jingrakhe la nang pyniphuh iphieng bad pynsah kynmaw shuh shuh da ka jingplie ia ka ophis jong ka party hapoh Dimapur District da u president ka party ka jylla u Dr. Andrew Ahoto Sema.
Haba pynpaw halor ka jingkongsan jong kane ka sngi, u president ka jylla ula ai khublei ia ka Dimapur District Unit halor ka jingtrei borbah ka jong ki bad halor ka jinglah ban thaw ia ka ophis jong ka party tang ha i por iba khyndiat.
Nalor kata u khot ruh ia ki nongtrei ka party ba shim ia ki nuksa jong u P.A. Sangma uba la aiti ia baroh ka jingim jong u na ka bynta ka bha ka miat jong ki paidbah nongshong shnong bad ka imlang sahlang hi baroh kawei.Ula iathuh ruh kham bniah halor ka jingim jong u PA Sangma naduh kaba sdang lyngba ka shnong rit hapoh Garo Hills bad kumno ba ula kiew shaphrang kat haduh ban ioh long kum u Lamphang ka iingdorbar ka Lok Sabha lyngba ka jingtrei minot, ka jingkut jingmut bad jingshemphang ka jong u.
Katkum u Dr. Andrew Ahoto Sema, ia u PA Sangma la tip bha kum u briew uba biria uba ia sngewtynnad paralok bad uba sngewrit bad kaba la pynlong ia u ba un kylla long u riew pawkhmat hapdeng baroh ki party.
Shuh shuh ula pyntip ruh ha ka jingialang ha kaba iadei bad ka jingiaid shaphrang jong ka NPP haduh ba kan da kylla long ka National Party naduh ba la sdang ia ka ha ka snem 2013, kata hadien ba la seng da une u nongialam bala khlad noh u P.A. Sangma.
Kumta ruh ula ong ba kane ka jingdap 10 snem jong ka party NPP ka long ka sienjam kaba kongsan ha ka jingiaid lynti na ka bynta ban pyniaid shakhmat ia ka thong bad ia ki jingangnud jong u PA Sangma kiba ula bsut ha ka party.
Kham hashwa jong kane ka prokram ia kaba la pyniaid da u Rocky I. Ngully, General Secretary, Dimapur District la sdang lyngba ka jingduwai na ka Alemla, President, State Women Wing bad bud da ka jingkren pdiang na u Yanger Toshi Ao, President, Dimapur District.
Kiwei pat kiba la ai ia ki jingkren ba lyngkot ki kynthup ia u Lima Longchar, State Advisor cum Convenor, Mokokchung District, u Abel Achumi, State Secretary (Protocol), u Heto Achumi, Vice President, NPYF Nagaland State, bad uApong Aier, President, NPYF, Dimapur-3.
