Ioh ki jain thain kti bad ki jain ryndia ka Meghalaya ia ka GI Tag

Shillong, Iaiong 02: Ka long ka jingjop kaba khraw ia ka jylla Meghalaya ha kaba ka jain Ryndia ryngkat bad ki jingthain da ki kti, kiba la pynmih da ka Meghalaya kila ioh ia ka jingithuh bad jingmynjur ban ioh pdiang ia ka Geographical Indication (GI) Tag ne Shap na ka Sorkar India.

Ia katei la pynbna da ka Geographical Indications Registry, hapoh jong ka Intellectual Property Office bad ia ki jingbatai kiba bniah ia ka jing rejistar la dep ban pynmih ruh ha ka website jong ki bor pyniaid ka GI.

Ka GI ne Geographical Indication kadei ka kyrteng ne ka shap kaba la pynkhamti sha ki mar kaba la pynmih na kano kano ka jaka.
Kane ka jingai jingithuh kala long kum ka jingioh kheit ia u soh ka jingjop hadien ka jingtrei shitom kaba 4 snem da ka Tnad Textiles jong ka sorkar Meghalaya. Ka Tnad Texitiles ryngkat ka jingioh ia ka jingkyrshan jong ka NABARD bad na u riewshemphang ka GI Dr. Rajnikanth, kiba la shimkhia ban ai jingkyrshan ia ka jingaplai lang jong ka Tnad Textiles bad ka Meghalaya Ryndia Producers Association ban ioh ia ka GI Tag ia ka ‘Ryndia’, hadien ba la dep ban pynbna ia ka shnong Umden-Diwon kum ka Eri Silk Village kaba nyngkong eh ha ka jylla ha ka 12 tarik u Rymphang 2021.

Uba la ialam nakhmat ban pynioh ia ka shap GI, u Principal Secretary ka Tnad Textiles u Bah Frederick Roy Kharkongor, uba la ialam ia ka kynhun kaba kynthup ia ki heh ophisar ka Tnad Textiles, ki dkhot jongka Meghalaya Ryndia Producers Association bad ki nongthain kti kiba tbit, ban pynpaw ia ka kam ka jongki hakhmat jong ka jingialang jongka Consultative GI Group kaba la long ha Kolkata ha ka 20 tarik u Naiwieng 2024.

Ia ka jain Ryndia, la khot ruh kum ka Peace Silk ne Ahimsa Silk, kadei kaba don ia ka histori kaba la palat ia ka hajar snem. Kadei kaba la thain da ki paid Khasi, Bhoi bad Jaintia, kane ka jain kadei kaba iadei bad ka mariang ka bym shym la pyndonkam ia kino kino ki kynja dawai ban wieh rong, hynrei la shaniah ha ka rong kaba la pynmih da ki jingthung tynrai. Kaba la pawnam ha ka jinglong ka jain kaba shongkhia bad kaba neh slem, ka jain Ryndia mynta kala nang pawnam kum ka jain kaba kyrpang kaba lah ban pyndonkam man la ka sngi ne ha kaban riam kyrpang.

Ia ki jain Ryndia tynrai kiba la thain da ki Khasi la pyndonkam ruh kum ki jainkup ne mophlor. Ki longkmie riewlum ka Meghalaya kidei kiba nang bha ban suh bad thain ia ki jain Ryndia kaba long kum ka jingkamai jakpoh tynrai ka jongki. Ka kam suh bad thain jain kadei kaba ki treikam pura bad ka kolshor ban pynmih ia u ksai Ryndia bad ka jingthain jain ka long ka kam kaba kongsan na ka bynta ban ioh ia ka lad ban kamai kajih bad kala long ruh ka kabu ia ki longkmie ba kin ioh ban synniang shuh shuh ia la ka longiing, khamtam ia kito kiba la longkmie kiba la noh ha ka rta bad ia ki longkmie kiba dnag biang ia ka rta ki bym lah ban leit trei ha ki lyngkha.

Ka jinglong jingman ki jaka ha rilum Khasi jong ka Meghalaya kadei kaba la bna nam ha kaban pynmih ia u ksai Ryndia ha ki rong tynrai bapher bapher da kaba thain da ki kti bad ka jingtbit ki longkmie Khasi ban thain jain tynrai kala nang pynriewspah ia ka riti dustur tynrai bad ia ka kolshor ha kaba ki longkmie ki lah ban kyntiew shuh shuh ia ka sap ka phong ka jongki ha ka kam thain jain ban pynmih ia ki mar kiba lah ban die ym tang hapoh ka jylla hynrei wat shabar ri ruh.

Ki Longkmie Khasi na kitei ki thain ki iashimbynta ha ki kam kiba iadei bad ka ioh ka kot, ka imlang sahlang bad ka kolshor kaba iadei bad ka kam thain jain bad ki iada ruh ia ka jinglong jingman kaba riewspah jongka mariang sawdong sawkun ka jylla da kaba pyndonkam da ki tiar bad ki mar tynrai ryngkat bad ka jingdon ia ki buit treikam ki bapher bapher.

Ka jingai ia ka jingithuh da ka GI ia ka jain Ryndia ka Meghalaya bad ia ka Tnad Texitles ka iaid ryngkat bad ka jingiohi jngai jong u Myntri Rangbah ka jylla u Conrad K. Sangma ban kyntiew shuh shuh ia ka kolshor kaba naduh hyndai hynthai kum ka bor kaba jem bad wat u Myntri ka Tnad Textiles u Bah Paul Lyngdoh ula leh ia ka bynta kaba kongsan ban kyntiew ia ki mar tynrai kiba kyrpang kiba la pynmih da ka jylla bad ban pynthikna ba kidei kiban iohi ym tang ha ki rynsan jong ka ri hynrei wat ha ki rynsan kiba don shabar ka ri.