Guwahati, Lber 28 : U jumai uba jur bha bad ba kot 7.7 magnitude ula khynniuh na Central Myanmar ha ka step sngi Thohdieng, uba la pynkhynniuh ruh ha kylleng ki ri ba marjan kynthup ia ka India, China, Thailand, Vietnam bad Bangladesh. Hadien une u jumai, ula khie biang sa uwei u jumai ba bud, uba kot haduh 6.4 magnitude.
Ka thymmei jong une u jumai ka dei na sor Sagaing, kaba jngai kumba 17 km na Mandalay, Myanmar. Kat kum ka jingong ka United States Geological Survey (USGS), une u jumai ula khynniuh ha ka por 11:50 baje mynstep na ka jingjylliew ba 10 km.
Une u jumai ula wanrah ia ka jingjulor kaba jubor bha ia ki jingtei khamtam ki jingtei ba bun mala bad haduh 5 ngut ki briew kila iap ia kaba la pynthikna ha Myanmar. Lai ngut kila iap hadien ka jingtwa jong ka mosque. Ka jingkieng ba pawnam ha Mandalay-Ava Bridge ruh kala twa bad hap sha um.
Ka Sorkar shipai ha kane ka ri kala pynbna ia ka emergency ha ki 6 tylli ki thain : Sagaing, Mandalay, Bago, Magway, eastern Shan State, bad ka Nongbah, Naypyidaw. Ki kynhun ai jingiarap kila wad ia ki briew ha kylleng ki jaka kiba shah ktah ha une u jumai. Ki bor Sorkar kila kyrpad ruh ia ki Ri ka pyrthei ba kin ai lem ia ki jingiarap.
Ha India, ia ka jingkhynniuh u jumai la iohsngew ruh haduh ha Delhi ka Nongbah jong ka Ri ha ka por 11:50 baje bad ia ka jingkhynniuh kaba rit la iohsngew ruh ha Kolkata bad Imphal ha kaba ki paidbah kila hap ban iamih shabar. Hynrei donbok bay m shym la don kano kano ka jingjulor ne ka jingduh noh ki mynsiem briew.
U Myntri Rangbah duh ka Ri Narendra Modi ula pynpaw ia ka jingsngewkhia halor ka jingpynjulor u jumai ha Myanmar bad Thailad bad ong ba ka Ri India ka long kaba la khreh ban ai ia baroh ki jingiarap sha kine ki artylli ki Ri.
Haba thoh ha X, u Modi ula ong “Sngewkhia ia ki jinglong jingma na ka jingkhynniuh u jumai ha Myanmar bad Thailad. Nga duwai ia ka jingshngain bad ka bha ka miat jong baroh”.
