Shillong, Lber 26 : Ka Sorkar Jylla kala rai ba baroh ki Civil Hospital ha Jylla ki dei ban don ioh noh ia ka jingsam bording ba mang kyrpang na ka bynta jong ki.
Haba pyntip ia kane hadien ka jingialang jong ka Kynhun Myntri ha ka sngi Balang, u Myntri ka tnad Bording AT Mondal ula ong ba ha ka pilot basis (jingpyrshang) ka Meghalaya Energy Corporation Limited (MeECL) kala shim ia ka Shillong bad ka Tura Civil Hosptal ban pynthikna ba kin ioh ia ka bording kabym thut satia wat lada mih don kan kano ka jingjia.
“Kumta, ngi la kyrpad ia ka Sorkar ba kan ai jaka ia ngi ha phyllaw ka Ophis ka Sericulture ha Tura, kaba ngin pyndonkam ban buh ia ka sub station ba 33/11 bad 25 MVA kaba mang beit thik ia ka Tura Civil Hospital” ula ong.
“Ban pynkhlain ia ka jingsam bording sha kiwei kiwei ki jaka ruh, ngi la pan jaka na ka Sorkar kaba don pyrshah ia ka ktem ki BSF ha Danagre bad kawei ha jaka ka MTC ha Dakopgre bad ka Sorkar kala mynur ban ai ia kine ki lai tylli ki jaka” iathuh u Mondal haba bynrap “Kine ki lai tylli ki sub station ki ban mih ha Tura”.
Nalor kane, u Myntri u pyntip ba ka Kynhun Myntri kala mynjur ia ka jingtyrwa ban kyntiew kyrdan ia ka NEHU bad ka Mawlai Sub Station ban lah pyndap ia ka jingnang dawa bording ha ka thain.
“Ngin sa shna ruh ia ka Sub Station ba thymmai ha Mawkhanu ban kyrshan ia ka jingsam bording ia ka nongbah Shillong” ula bynrap.
