Shillong, Lber 25 : Ka Ministry of Social Justice & Empowerment (MoSJE) kala kular ia ka Sorkar Meghalaya ba kan bei tyngka ia ka Jylla ba kan shna ia ka madan ialehkai ki briew ba don jingduna dkhot met (centre for disability sports) ha Jylla.
Ia kane la pyntip da u Myntri ka tnad Social Welfare Bah Paul Lyngdoh hynne ka sngi Ba-ar bala pyllait paidbah ia ka Sugamya Yatra ha Soso Tham Auditorium.
Kat kum ka jingong jong u, kane ka jingkular kala mih na ka jingialang hapdeng u Myntri Rangbah ka Jylla Conrad K Sangma bad u Myntri ka MoSJE Virendra Kumar kaba long mynshem taiew ha ka jingiadon ryngkat lang ma u.
U Bah Paul ula pyntip ba ha ka jingiakren, u Myntri ka MoSJE ula kular ban bei tyngka ia ka madan ialehkai jong ki briew ba duna dkhot met k ban sa tei ha Mawkhanu, New Shillong.
Haba pynpaw ba kane ka project kan sa seisoh shen, u Bah Paul ula pynpaw ia ka jingkyrmen b aka Jylla kan sa iohi ia ki briew ba don jingiaduna dkhot met ba kin ialehkai ha ka National Games, 2027 ka ban pynlong da ka Meghalaya.
Ka Sugamya Yatra ka dei ka sienjam bala shim da ka jingthmu ban plie lad plie lynti bad ai bynta lem ia ki briew ba don jingduna dkhot bet. La pynlong ia ka da ka Ophis ka Commissioner for Person with Disability ha ka jingiatreilang bad ka State Resource Centre on Disability Affairs (SRCDA), Shillong bad ka Composite Regional Centre, Shillong/
Ka Sugamya Yatra ka dei shibynta jong ka Sugamya Bharat Abhiyan bala wanrah da ka Ministry of Social Justice & Empowerment, ka Sorkar India.
Kiwei pat kiba la ai jingkren ki kynthup ia ka kong Bridget Warshong, Deputy Commissioner for Person with Disability bad kiwei kiwei.
Haba kren halor ki prokram sengkam sengjam na ka bynta ki briew ba don jingduna dkhot met, kaba dei u soh ba mih na ka Empower Fest, ka prokram bala kyrshan da ka Sorkar Jylla bad ka Tnad Social Welfare ha ryngkat ka jingiatreilang bad ka PRIME Meghalaya, I kong Bridget ila iathuh ba phra ngut ki nongsengkam kila shah jied ban ioh jingkyrshan pisa na ka PRIME Meghalaya, bad ioh ia ka song pisa ba kot T.22 lak baroh lang.
Ia kine ki phra ngut ki nongseng kam ba don jingduna dkhot met la pynkup burom ha kane ka jingialang bad kine ki dei i
Larikyrpang Nongrum (Lari Cyber and Stationery), Ferdinand Lyngdoh (EKANBHA), Donrisha Mawrie (Cultivating high-quality sustainable flowers), Dispi Kharbuli (blacksmith), Batskhem Kharkamni (Furniture), Bansuklang N. Sohlang (Steel fabrication), Bandarisha Rynjah (Custom embroidered products) bad George Eric Campbell Marbaniang (Electrician bad wiring).
