Shillong, Lber 25 : Ki nongshongshnong jong kiba bun ki shnong khappud ka thain Balat bad Dangar, kila rit mynsiem bad shongsyier bad don ruh kila hap ban apshnong namar ka jingwan shang shnong jong ki hati khlaw kiba la pynjulor kat ia kaba don ha ka lynti iaid jong ki.
Kane ka jingwan jong ki hati khlaw sha ki shnong ki thaw ka thain kala sdang naduh kine ki khyndiat bnai bala leit noh bad ka jingwan jong ki, la suba jur ba ka dei na ka jingwan wad bam.
U Rangbah Shnong ka Balat Bah Kloiland Khardewsaw ula iathuh ba arbnai mynshuwa, kine ki hati kila wan bad sah ha ka thain Umsawrang bad kumjuh ruh ha Lad Bakli, kiba hap hapoh ka Mawsynram C&RD Block.
La suba jur ba kine ki hati khlaw kila wan kiew na ka Ri Bangladesh bad kumjuh ruh na Ri-lum Garo.
U Bah Koiland u iathuh ba kine ki hati kila wan rung lyngba ka thain Ranikor bad mynta kila poi sha ka thain Balat bad Dangar da kaba kam ia ka wah Umngi.
U iathuh ba ki hato kiba shong ha ka thain Lad Bakli kila poi ruh wat sha ka thain Khar-a-bri bad mynta kila don ha ka shnong Umlynter kaba hap hapoh ka jingpeit jong ka Hima Dwara Nongtyrnem.
Une u Rangbah Shnong u iathuh ba ki paidbah ka thain kila duh thiah duh dem mynta bad kila pynlong ia ka jingpahara ban lait na ka jingshah pynjulor ki iing ki sem.
Ki nongshongshnong ka thain kila kyntu ia ki bor ba dei khmih khamtam ia ka Tnad Wild Life ba kin leh eiei halor kane ka kam khnang ba ki paidbah kin lait na ki jingma bad jingmynsaw.
