Shillong, Lber 17 : Ka jingbym don ka jingiatreilang hapdeng ka Tnad Forest bad ka Tnad Mining & Geology, kala lam sha ka jingbym lum ia ka khajna kaba kot haduh T.1.18 klur.
Ia kane la pynpaw da ka Comptroller and Auditor General of India (CAG) ha ka kaiphod halor ka jingioh lum pisa jong ka Jylla na ka bynta u snem ba kut ha ka 31 tarik Lber, 2023.
Ka kyndon 3 jong ka Meghalaya Minerals Cell (MCC) Act, 1988 kala kren ia ka jinglum ia ka khajna na u dewiong, sillimanite, mawshun, fire clay na kino kino ki briew kiba kit ia kine ki mar na kano kano ka jaka pyllang ha ka Jylla. Kat kum ka jingpynbeit kaba la don, ka jinglum ia ka khajna ia kine ki mar la leh da ki District Mining Officer.
Ban pynthikna ia kane ka khajna la thep da ki nongshimwai, ka Tnad Forest ka ai ia ka form K3651 sha ki nongshim rai kaba buh kyndon ba ki hap ban ai ia ki jingtip ba bniah ia ka khajna bala siew. Ym dei ban ai Transport Challan sha ki nongshimwai tad haduh ba kila siew pyndep ia ka khajna bad ki District Forest Officer kila ioh pdiang ia ka Form K.
“Ka jingleh audit (Jymmang-Jylliew 2023) ia ki kot ki sla jong u Divisional Forest Officer (DFO), Social Forestry & Territorial Division, Nongstoin hapdeng u Iaiong 2018 haduh Lber 2023 la shem ba 16 ngut ki mining leases kila ioh jingbit haduh u Lber 2023. Napdeng kine, 16 ngut ki mining leases, la shem ba ka khajna ba T.1.18 klur ym shym la lum satia na ki laingut ki nongshimwai ia ka par hapdeng katei ka por” ong ka CAG.
“Watla u DFO u don ia ki jingtip halor ka jingkhaii ia u mawshun, u DFO ula dei ban bthah ia ki nongshimwai ba kin thep ia ka khajna ba dei ban siew hashuwa ban ia ia ka Transport Challan (Form-H). Hynrei, u DFO u khlem bthah ia ki nongshimwai par ba kin thep ia ka khajna lane pyntip sha ka Tnad Mining ba kin dawa ban siew ia ka khajna na kine ki nongshimwai par” kala bynrap.
Ia kane ka kam la pyntip sha ka Tnad ha u Nailur 2023 bad hadien sha ka Sorkar ha u bnai Risaw 2023. Ban pynthikna la ki nongshimwai par kila siew ne em ia ka khajna, ka Audit kala rah iakren ia kane ka kam bad ka DMR ha u Risaw 2023.
Hadien kane, ha u Naiwieng 2023, ka DMR kala jubab ba kam don satia ia ki kot ki sla halor ka jingsiew ia ki khajna da kine ki nongshimwai par naduh ka 4 tarik Kyllalyngkot 2019 haduh ka 19 tarik Nohprah 2019. Ia kane kajuh ka jingtip la pan ruh na ki nongshimwai ia ki par bad hadien kane yn sap hah ia ka demand notice sha ki. Kat haduh u Lbeer 2024, ym pat ioh jingtip satia halor ka jingsiew ia ka khajna da kine ki lain gut ki nongshimwai ia ki par.
