Shillong, Lber 10 : U Nongshna phlim bad nongtem ba pawnam ka Jylla Bah Wanphrang Diengdoh ula poi mynta ha ki rynsan ka pyrthei lyngba ka kam shna phlim bad shen ia ka phlim thymmai jong u “The Blood and the Border” yn sa pyni paidbah ha Portland Hall, London, United Kingdom naduh ka 14 tarik Lber.
Ka “The Blood and the Border” kan dei ka phlim kaba lai bala pynmih da u Bah Wanphrang K Diengdoh hadien jong ka phlim “Because We Did Not Choose” (2017) bad “Where the Clouds End” (2015).
Ia kine ki lai tylli ki phlim la shna da ka jingkyrshan lyngba ka jingiarap pisa (grant) bala ai da ka Sorkar Jylla lyngba ka Meghalaya Age Limited bad ka Hello Meghalaya-ka prokram jong ka Sorkar ban kyrshan bad plie lad plie lynti ia ki nongshna phlim.
Ka phlim “The Blood and the Border” ka dei ka documentary halor ka jinglehniam leh tynrai jong ka Hima Khyrim bad ka jingiatyngkhuh bad ki kam ki Missionary Khristan ha ki snem 1800 lem bad ki jingtynjuh ba iashem mynta.
Ka phlim “Because We Did Not Choose” ka pyni ia ki jingshem jong ki nongbylla trai ri ha ka thma bah ba Nyngkong bad ka jingiakynduh jong ki ha ka jingim kat kum ka jingiaid jong ka por.
Ka pyni biang ruh ia ki kam jong ki nongbylla riewlum na ka thain shatei lammihngi kiba la iashim bynta ha ka thma bah ba ar.
Katba ka “Where the Clouds End” ka iathuh khana shaphang ki phang kiba jyrwit jyrwat kum ka Jaidbynriew, ka jinglong khuid, ka sain pyrthei ba hapoh bad shabar, ka jinglong trai bad ka jingktah na ki khappud bad kiwei pat ki Ri.
Ka prokram jong ka Sorkar Jylla bala tip kum ka Hello Meghalaya, ka dei ka sienjam jong ka Sorkar ban kyntiew bad pyninam ia ka kolshor ba riewspah jong ki Jaidbynriew trai ri ka Jylla (Khasi, Jaintia bad Garo) sha ka pyrthei.
Ka Sorkar kala kynshew haduh T.10 klur ha kane ka prokram-ka ban ai jingkyrshan bad ka lad ka lynti ia ki nong shna phlim (Khasi, Jaintia bad Garo) ba kin sei ia ka sap ba ki don sha ka pyrthei.
Haduh mynta, haduh 1.84 lak ngut kila pyndonkam ia ka Hello Meghalaya bad haduh 450 ngut ki nongshna phim kila ioh ia ka jingkyrshan.
Lah ban kdew hangne, ka Sorkar Jylla kala kynshew pisa ruh haduh T.17.5 klur sha ka Meghalaya Grassroots Music Project (MGMP) ban kyrshan bad ban plie lad plie lynti ia ki nongrwai, ki nongput nongtem bad ki nongpyniaid ia ki tamasa ha kaba haduh 3617 ngut ki nongput nongtem bad nongrwai kila register ialade.
U Bah Wanphrang K Diengdoh u dei u Nongshna phlim uba la ioh bun ki Award bad ki kam jong u bun eh ki dei kiba ula leh halor ka snap ba kyrpang jong ki riewlum ka Jylla.
