Maham tyngeh ka Sorkar ia ki Nonghikai ba aikam bujli sopsop ha ki skul Sorkar

Shillong, Rymphang 10 : U Myntri ka Tnad Pule Puthi Rakkam A Sangma ha ka sngi Nyngkong, ula maham ban leh da kaba tyngeh ia kito ki Nonghikai kiba aikam bujli ia ka kam jong ki sha kiwei pat (proxy teacher) ha kylleng ki skul Sorkar ha Jylla.

“Lada ngi ioh pdiang ia kano kano ka jingujor ba kum kane, ka Sorkar kan leh da kaba tyngeh pyrshah ia kitp ki nonghikai bad ngi kyrpad ruh ia ki nonghikai ba lada phi la aplai kam ban long nonghikai, sngewbha long ki nonghikai” ong u Rakkam haba iakren bad ki nongthoh khubor.

“Ka Sorkar kan sa pynmih ruh ia ka jingmaham kaba tyngeh ia ki Khlieh pyniaid jong ki skul ba ka dei ka jingkitkhlieh jong ki lada ki shah ban thungkam bujli namar hadien ba pyndait ia ka Teachers Information Management System (TIMS), phin hap shim ia ka jingkitkhlieh” ula bynrap.

Kat kum ka jingong jong u, ki Nonghikai kim lah ban aikam bujli ia ka kam jong ki sha kiwei pat ki briew.

U Rakkam ula ong ba ki don bun ki skul kiba la thung ia ki nonghikai bynrap da ka jingpynlut hi nalade ban pyndap ia ka jingduna ki nonghikai. “Hynrei phim lah ban thung iano iano ha ka jaka jong phi, kane ka dei kaba bakla” ula ong.

Haba kyntu ia ki nonghikai ba kim dei ban leh ia kum kane ka jait kam, u Myntri ula ong ‘Lada phi don kino kino ki kam ba kyrkieh, phi lah ban pan da ka shuti kat kum ka lynti kaba dei…kane ka dei ka jingkyrpad jong nga”.