Nongstoin, Risaw 16 : Ka Nongstoin, Headquater ka West Khasi Hills District, kala pynkhlain ia ki jingpyrshang ban wanrah ia ka khuid ka suba da ka jingplie ia ka Waste Recovery Centre bad ka jingpyrshang thymmai ban pynia khlad ia ki niut bapher bapher.
Ka Deputy Commissioner Hema Nayak kala plie ia kane ka Centre hapoh ka DC Office Complex hajan ka Tersem Hall ha ka sngi Palei, kaba pyni ia ka dak ka jingpynkut ia ka jingialap jong ka Swachhata Hi Seva 2026.
Kane ka Centre ka thmu ban pynduna ia ka jingleit bret niut sha ki jaka theh nuit ka thain bad tehlakam ia ka jingkynton ki jaboh jabain ha ki jaka paidbah bad ki lynti iaid um. La pynwandur ia ka ban pyn iakhlad ia saw jait ki jaboh : ka jaboh ba jhieh, ka jaboh ba lah ban recycle ne pyndonkam biang, ka jaboh ba hap ban leh phikir bha bad ki jaboh bym lah ban recycle.
Ka bor district ka phai khmat ruh ban pynkylla ia ka rukom pyniaid ia ki jaboh jabain sha ki lad kyntiew ia ka ioh ka kot. Ka jingpyniakhlad thikna ia ki jaboh ba lah ban pyndonkam biang, lah ban die sha ki kompani, ka ban wanrah ia ka kamai sha ki self help group ka thain bad ki Committee jong ki shnong.
Ia ki jaboh organic, ka bor district kala iatreilang bad ka Tnad Agriculture bad ka Meghalaya State Rural Livelihood Society (MSRLS) ban ai jinghikai ia ki nongrep, ki anganwadi centre bad ki kynhun ha ki shnong ba kin pynkylla ia ki jaboh ba mih na ki jingbam sha ka sboh organic. Ia kane ka sboh la thmu ban pyndonkam ha ki School Kitchen Garden bad ki farm ka thain.
Ban pynkhlain ia ka jingpyrshang ban wanrah ia ka khuid ka suba, la sam ia ki tiar iada kynthup ki boot bad glove sha ki nongtrei kiba don jingiadei bad ka State Rural Livelihood Mission (SRLM).
Ha kane ka jingialang la ai jingithuh ruh ia ki Ophis treikam bad ki Shnong halor ka jingialeh ban wanrah ia ka khuid ka suba. Ka Mawshynrut Police Staton kala ioh ia ka jingithuh kum ka police station ba khuid tam katba ka Langpih Border Outpost kala ioh ia ka jingithuh kum ka Border Outpost ba khuid tam. Ka Maweit Primary Health Centre kala ioh ia ka jingithuh kum ka Health Centre ba khuid tam.
Ka Shnong Pyndengrei Dong Tiehrit kala ioh ia ka jingithuh kum ka shnong kaba treikam bha duh, katba ka PHE Office ha Nongstoin kala ioh ia ka jingithuh kum ka Ophis ba treikam bha tam. Ka Mount Hermon School kala ioh ia ka jingithuh namar ka World Painting Competition.
Ka bor district kala pynkup burom ruh ia ki nongioh bynta jong ka Pradhan Mantri Awas Yojana Kong Spilda Kharbani ba na Mawkhlam, kong Wimsilin Tympuin na Siejlieh bad kong Brillancy Marwein na Mawkawah.
