Shillong, Risaw 16: Ka Central Project Management Unit (CPMU) bad ka Meghalaya Power Generation Corporation Limited (MePGCL) kila leit ban jurip lang ia ka Umiam-Umtru Stage-IV Dam ha Ri-Bhoi ban bishar ia ki jingshna pynkhlain ia ki machine pynmih bording ne hydro-mechanical rehabilitation work, hapoh ka project Dam Rehabilitation and Improvement Project (DRIP-II), bad ban ithuh ia ki lad ki lynti ban pynsted ia ka jingpyntreikam.
Kiba la iadonlang ha ka jingjurip ki kynthup ia ka Central Water Commission (CWC) bad ka State Project Management Unit (SPMU).
Ka jingleit jurip ka pynleit jingmut ha kaba peit thuh ia ka jingiaid shaphrang jong ki kam kiba dang pyntrei, ban weng ia ki jingeh kiba mih na ki jaka treikam bad ka jingiatreilang khnang ban pynthikna ia ka jingpyntrei kam ha ka por ba dei ban pynkhlain ia ki machine.
Ka Hydro-mechanical rehabilitation ka dei ka bynta kaba kongsan tam ha ka jingsumar bad pynneh ia ki dam. Ka kynthup ia ki kam halor ki machine kaba don jngiadei bad ka jingpyniaid bad tehlakam ia ka jingtuid ka um, kynthup ki gate bad kiwei kiwei. Kine ki kor ki long kiba kongsan na ka bynta ka jingshngain bad ka jingtreikam kaba lah ban shaniah jong ki dam.
Kane ka jingbishar ka plier uh ia ka lad ban ithuh ia ki jingeh ha ka jingpyntrei ia ki kam bad ka pynkhlain ia ka jingiatrei lang hapdeng ki Tnad bapher bapher kiba don bynta ha ka project
