Shillong, Risaw 16: Kawei ka karkhana coke ha shnong Rajaju kaba don harud ka surok Nongjri, South West Khasi Hills District, kala khang dam shipor hadien ka jingiakhih pyrshah da ki nongshong shnong ha ka sngi Palei, halor ka jingkynnoh ba don ka jingleh bym hok ha ka jingseng ia ka karkhana bad ka jingpyntreikam ia ka.
Ia kane ka jingiakhih la pynlong da ka Seng Samla Hima Langrim. Ki nongiakhih kila pynpaw ia ka jingsngewkhia halor ka jingkynnoh ba kam don ka jingiasyllok kaba biang, ka jingiada ia ka mariang bad ka jingshai halor ka jingbit ban pyntreikam ia ka karkhana.
Ka Seng Samla kala kynnoh ba ia kane ka karkhana la seng da ka jingai jingbit na u Syiem ka Hima Langrim khlem da khot ia ka Sorkar Shnong lane don ka jingiasyllok bad ki shnong kiba shah ktah. Kala pynpaw ba ka rai ba iadei bad ka jingtrei ki karkhana ha ki shnong ki thaw ka dei ban pyniadon bynta lang ia ki nongshongshnong bad burm ia ki bor treikam nala tynrai.
Ki nongshongshnong kila pynpaw ruh ia ka jingsngewkhia halor ka jinglah ban ktah jong kane ka karkhana ia ka jingkhuid ka lyer, ki um ki wah ba marjan bad ki jaka rep. Ki karkhana coke ki lah ban pynjaboh ia ka lyer bad u pui pui dewiong, kaba pynsngewkhia jur halor ka jingma ia ka mariang bad ka koit ka khiah u paidbah lada kam don ka lad ban tehlakam ia ka jingpynmih ia ki jaboh.
Kat kum ka jingong ki nongiakhih, ki nongshongshnong kila leit iakren ia ka Meghalaya State Pollution Control Board (MSPCB) bad ki bor district ba pan jingshai halor ka jingbit bala ai ia ka karkhana hynrei kim shym la ioh satia ia ka jubab kaba pynhun. Namar kata, kila mih ban tular bad pynsangeh ia ka jingtreikam kane ka karkhana.
Ka Seng Samla Hima Langrin ka dawa ia ki bor distrct ban khangdam ia ka karkhana bad khang shuwa ia ka tad haduh bala dep pynlong ia ka Environmental Assessment ba bniah.
Kala dawa ruhn ba pynshisha ia ki jingai jingbit kat kum ki ain ia ka karkhana bad ka jingpyntreikam ia ki kyndon bala buh.
Kane ka jingjia kala pynphai khmat biang sha ka jingbishar ia ki karkhana coke ha South West Khasi Hills, khamtam hadien ka jingshem jong ka Committee u Justice BP Katakey bala thung da ka Iingkashari Meghalaya High Court, ban bishar ia ki kam ba iadei bad ka jingtih bad shalan ia u dewiong.
Kat kum ki jingshem bala kdew ha ka kaiphod, ka MSPCB kala dep ai ia ka Consent to Establish (CTE) sha ki 15 tylli ki karkhana coke ha ka thain, katba tang 10 tylli ki don ia ka Consent to Operate (CTO). San tylli ki karkhana kim pat aplai ia ka CTO< kaba donkam hashuwa ban pyntreikam ia ki karkhana.
