Nongpoh, Rymphang 10: Ka akor ka burom ia ki riewtynmen bad kiba la san la rangbah kala hiar bha ha kane ka pateng ba mynta bad wat ha ngi ki Khasi Khara ba ju iatip kum ka Jaidbynriew “Tip-briew Tip-blei” bad “Tip-akor”, kane kala sdang jah bad lah ban sakhi ia kane na ka jingnang bun ki riew tynmen kiba hap ban leit sah sha ki Iingbasa ba ri tynmen (mercy home).
Kum ka jingpyrshang ban kyrsiew thiah bad ban pynim biang ia ka mynsiem “Tip-briew Tip-blei” bad ka “Tip-akor”, ka University of Science & Technology Meghalaya (USTM) hynne ka sngi Nyngkong, kala pynlong ia ka Dorbar (conference) iamir jingmut halor ka phang “Elderly Life Matters : A Human Right Perspective” bala kyrshan da ka National Human Rights Commission (NHRC), New Delhi.
Ia kane ka prokram la pynlong da ka Tnad Social Work ka USTM da ka jingthmu bann iatai halor ki mat kiba kongsan kiba ktah ia ka jingim jong ki riewtynmen bad ia ka hok longbriew manbriew jong ki.
Haba ai jingkren kum ka kongsan, ka Chairperson ka Meghalaya State Women’s Commission (MSWC) Kong Iamonlang M Syiem kala ban khia halor ka jinghiar ka akor ka burom ia ki briew kiba la san ha ka rta bad ka jingdonkam ban phaikhmat halor ka jingdonkam ban pynioh ia ka hok longbriew manbriew ia ki briew bala san ka rta lyngba ka jingiatreilang hapdeng ki kynhun bapher bapher.
Ha kane ka prokram ba arsngi, kan don ruh ka jingiamir kaba bniah hapdeng ki riewpawkhmat bapher bapher, kynthup ki riewshemphang, ki nongthaw ain bad ki nongmihkhmat na ki kynhun sengbhalang ban wanrah ia ki lad ki lynti kumno ban phaikhmat kyrpang halor ka jingim jong kito ki briew kiba la san ka rta ha ka Jylla.
Ka jingiamir jingmut kan long ruh halor ka koit ka khiah ki briew bala san ka rta, ka jingshah niew bein, shah leh bein, ki lad ai jingiada kiba kyrpang bad kiwei kiwei.
Kiba la iadonlang ha kane ka sngi ki kynthup ia ka Kong Felicita L. Majaw, dkhot barim jong ka Meghalaya State Women’s Commission, u Prof. G.D. Sharma, Vice-Chancellor of USTM, u Himanshu Rath, Founder and Chairman ka Agewell Foundation, India nalor kiwei kiwei kiba shah khot sngewbha.
.){kind=link}