Shillong, Nailar 28: Ka People’s Democratic Front (PDF) ka la pynbna paidbah ba kan pynieng da u General Secretary ka seng u samla Auspicious Lyngdoh Mawphlang kum u kyrtong ban airing iaka elekshon MLA 2023 na Mawphlang Constituency.
Ia katei la pynbna da u President ka PDF u Bah Gavin Mylliem haka jingialang kaba la long ha Mawphlang ha ka 27 tarik u Nailar bad ha kajuh ka por ula pynskhem ruh ia ki nongkitkam ka PDF Zonal Committee Mawphlang Constituency.
U samla Auspicious u dei uba la pyndep ia ka jingpule ha ka kyrdan MSc Environmental Science na ka skulbah North Eastern Hills University bad ula long teng ruh kum u President ka North Eastern Hills University Students’ Union (NEHUSU).
Une u samla u la aireng teng iaka elekshon MDC na Mawphlang-Diengiei Constituency ha u snem 2019 hynrei ym shim la poi sha ka thong bad mynta ula pynkhreh ban iakhun iaka elekshon MLA kaban long ha u snem ban wan.
U Bah Gavin Mylliem u la kyntu ia ki paidbah ban ailad ia u samla Auspicious ban mihkhmat ia ka Constituency ban pynthikna ba kan don ia ka jingkylla ym tang ha ka roi ka par hynrei ha baroh ki liang.
U samla Auspicious haba kren ha ka jingialang, u la ong ba u mih mynta ka kynti ban iakhun ia ka elekshon namar u la iaid bad ïohi ia ka jingeh kiba u paidbah u iakynduh man la ka por.
“Nga la rem khyndiat eh ha ka elekshon MDC bad kadei ka jingkyrshan radbah bad ka jingieid kiba phi ai. Nga la iai bteng ban iatreilang kat ha ka bor kaba nga lah bad nangne shakhmat ruh, ngin dang īatrei lang khnang ban kyntiew ia ka bha ka miat ha ka thaiñ” ong u Auspicious.
