Itanagar, Rymphang 7: Ka Arunachal Christian Forum (ACF) ha ka sngi Palei ka la pynbna ban pynlong da ki jingiakhih ban pyrshah ia ka jingthmu jong ka seng BJP ka jylla ban pyntreikam ia ka ain pyrshah kylla niam (anti-conversion law) kaba la don 46 snem.
Haba kren sha ki lad pathai khubor, u President ka ACF u Tarh Miri u la ong ba ka kynhun ka thmu ban leit gherao ia ka iingdorbar jong ka jylla ha ka 6 tarik u Risaw, ka sngi kaba lah ban wanrah ia kane ka ain ban iakren hapoh iing dorbar hashwa ban pyntreikam ia ka.
U la ong ba ka kynhun kan pynlong da ka jingshah thngan ba shi taiew lynter naduh ka 10 tarik u February bad bud sa ka jingduwai paidbah ban dawa pynduh noh ia ka ain Arunachal Pradesh Freedom of Religion Act of 1978.
“Ngi la pynbeit ia ki prokram jingiakhih ban pyni ia ka jingpyrshah jong ngi ia ka ain kaba la sahteng ban pyntreikam da ki phew snem,” la ong ka Miri.
U la ïathuh ba kham mynshwa ki la ïakren ïa kane ka kam bad u Chief Secretary ha u bnai Naiwieng jong u snem ba la dep bad ai ruh ïa ka jingthoh sha u Myntri Rangbah ka Jylla u Pema Khandu.
