Shillong, Rymphang 07 : U Myntri Rangbah ka Jylla Conrad K Sangma ha ryngkat ka jingsynran ka Myntri ka koit ka khiah Kong Ampareen Lyngdoh, ha ka sngi Palei, kila hiar jurip ia ka MUDA Shopping Complex, ba ju iatip kum ka Iew Laitumkhrah, ban bishar ia ka jingiaid ka jingtei thymmai ia kane ka Iew.
Kane ka Iew, kaba la kylla dpei na ka jingpluh ding ha u snem 2022, mynta kala ieng biang da ka jingtei maw bad kala jan dep artad.
Ha kane ka jingjurip, ki nongshong dukan kila pynpaw ia ka jingsngewkmen ban iohi ba ka jingtei kala sdang ban wan dur, kaba ka jingtei kala dep kumba 60 percent eiei. Kane ka Iew la khmih lynti ba kan dei kawei na ki Iew shnong ba heh duh ha Shillong hadien bala plie ia ka.
Haba pynpaw ia ka jingsngewhun ia ka jingiaid ka kam, ka Myntri kaba dei ruh ka MLA ka thain kala ong “U Myntri Rangbah ba don burom, ha ryngkat bad ma nga, ngi la jurip ia kane ka jingtei thymmai jong ka Iew Laitumkhrah ban peit ia ki kam kiba la iaid ha kane ka jaka”.
Ka pyntip ruh ba ia kane ka project la buh ban pyndep ha u Lber 2026. Hadien bala pyndep, ka Iew kan ai jaka shong dukan ia kumba 500 ngut ki briew kiba khaii ia ki mar bapher bapher kynthup ki marbam bad kiwei kiwei.
“Kane ka Iew kan don ruh ia ki dukan bam ban pyni nam ia ki bam trai shnong nalor ki dukan otdoh bad ki jaka thang ia ki jaboh ban pynthikna ia ka jingkhuid jingsuba ha ka Iew” kala bynrap.
Lah ban kdew ba ha ka 28 tarik Risaw 2022, ka ding kaba klang bha kala bam duh ia ka Iew Laitumkhrah bad pynkylla dpei haduh 84 tylli ki dukan. Kat kum ka jinglum jingkhein ki Pulit, ka jingjulor ka kot kumba T.1 klur.
