Shillong Nailar 27: Ka MLA jong ka All India Trinamool Congress (AITC) na Mahendraganj Constituency ka Dkikkanchi D Shira hynne ka sngi Saitjain kala kynthoh iaka Sorkar MDA kaba la ialam da ka seng NPP halor ka jingtih be-ain ia u dewiong bad ka jingkular thok iaki longkmie.
Haba kren haka jingialang paidbah ha Mahendraganj, ka Dikkanchi kala buh jingkylli kaei kaba ka sorkar MDA kala leh na ka bynta ka jylla?
“Baroh ki tip lut iaka jingtih be-ain ia u dewiong ka jur bha ha Meghalaya. Man la ka sngi, bun ki jingim briew la shu duh ei namar kane. Hynrei ka NPP kaba ialam iaka sorkar MDA ka sait khuid haba ngi buh jingkylli hapoh ka iing dorbar thawain ka jylla” ong ka Dikkanchi.
Ka MLA jongka AITC kala ong “Nga kwah ban buh iaka maternity & child hospital ha kane ka jaka namar bun ki khyllung kila duh iaka jingim jongki. La dep ban bhah tyngka 5 snem mynshwa hynrei ka sorkar MDA kam shym la pyntreikam haduh mynta. Kaba kham thamula ka long, ba hapoh ka iingdorbar la pyntip ba shen yn sa sdang pyntrei noh hynrei kam shym la urlong . Ki paidbah ka jylla kin sa kynmaw ia kine ki jingkular thok jong ka sorkar kaba mynta bad kin sa ai iaka jubab kaba biang ha ka elekshon”.
Ha katei ka jingialang la iadonlang u Vice-President ka TMC jong ka Meghalaya u Zenith Sangma ryngkat ka jingdonlang u MLA ka Salmanapara u Winnerson D Sangma.
Na ka liang u Zenith Sangma ula ong, “Ka kam khaii pateng kila nang suhthied lyngba ka jingkhaii be-ain ia u dewiong. Kumno ki pyniaid ia ki trok jongki ha ki thain khappud? 2018-20, kawei ka trok ka hap ban siew T. 70,000, mynta ka dor ban iaid lyngba ka khappud ka long T.1,10,000. Kadei ka pisa khajna kaba la shah lute”.
“Ki paidbah kila nang duh iaka jingim ka jong ki naka jingtih dewiong be-ain, hynrei katei ka jingjia ba sngewsih kam shym la kut hangne hynrei ia u dewiong be-ain la shalan sha kylleng ki khappud. Ka long ka jinglehrain ba kum kine kiei kiei ki jia hynrei ka sorkar MDA ka iai kyntait beit” ong u Zenith.
