Shillong Nailar 27: Ka Meghalaya State Legal Services Authority (MSLSA) ryngkat ka jingiatreilang bad ka Directorate of Social Welfare, ka tnad Health & Family Welfare, tnad C&RD, District Legal Services Authority, East Khasi Hills bad kiwei, kila pynlong iaka Health Camp bad Awareness Programme ha St Peter’s Secondary School, Dangar, East Khasi Hills District.
Ha katei ka sngi, la ai jingpynshai halor ka NALSA (Effective Implementation of Poverty Alleviation) Scheme 2015 bad ia ki Welfare Scheme jong ka sorkar bad ia kane ka jingialang la plie da u Nongbishar jong ka Meghalaya High Court u Justice H.S Thangkhiew, uba long ruh u Executive Chairman jongka MSLSA.
U Justice H S Thangkhiew haba kren haka jingialang u la ai jingbatai halor ka NALSA scheme bad u la pynpaw iaka jingsngewhun halor ka jingpynlong ia kane ka prokram bad u la ai jingiaroh ia baroh ki tnad sorkar kiba la shimkhia ban pynlong ia katei ka jingialang kaba jop bad kaban ai jingmyntoi ia ki paidbah.
U la kyntu ia ki nongshong shnong ba kidei ban mih shakhmat bad ban iarap ia ki briew kiba donkam iaka jingiarap ha kaba iadei bad ki kam aiñ da ka rung dkhot ialade kum ki Para-Legal Volunteers bad ula pynshlur iaki paidbah ba kidei ban shim kabu iaki prokram bad ban jurip ia ki Stall ne ki jaka kiba la buh kyrpang da ki tnad sorkar bapher bad ban pdiang ia ki jingmyntoi kaba ki lah ban ioh.
Ha katei ka jingialang u Bah Thangkhiew u la leit jurip ia ki Stall kiba la buh da ki tnad sorkar bad ula aiti ruh ia ki tiar ki tar kiba kynthup iaki Wheelchair, Hearing Aid bad ki diengduh sha kito kiba don jingduna haka dkhot met.
