Shillong, Jan 27: Ka Mawlai Football Club kala ioh rung sha ka Final ha ka sien kaba nyngkong eh jong ka Meghalaya State League (MSL) hadien bakala pynrem da ka said da 1-0 ia ka Ladthadlaboh ha ka semifinal kaba la long hynne ka sngi Nyngkong ha SSA Stadium, First Ground, Polo.
Ia katei ka kol la thep da u Damanbhalang Chyne ha ka minit kaba 29 kaba la long syndon ka kol kaba la pynioh rung ia ka Mawlai sha ka Final.
Watla ka Ladthadlaboh kala ialehkai bha khamtam na u kapten bad u nongap kol u Ialamlang Biam, hynrei kane ka kynhun kam shym la lah ban thaw pyrthei eiei ban ioh ban pyniakhiad.
Ka Mawlai ha u snem bala dep kala shah pynliem noh ha ka Semifinal bad mynta ka kynti kan ap ban iakhun pyrshah ia ki nongjop ha ka Semifinal ka baar hapdeng jongka Rymbai Shkenshynriah bad ka Shillong Lajong.
Ka jingialehkai hapdeng kine ki artylli ki kynhun kan long ha ka sngi Baar ha Wahiajer Multipurpose Sports Complex, ha ka por 1:30 Mynsngi.
Ki paidbah na West Jaintia Hills kila wan ban ai jingkyrshan ia ka Ladthadlaboh kaba la iakhun ha ka sien kaba nyngkong eh ha ka Semifinal jong ka MSL.
U Buromlangki Salahe ka Ladthadlaboh ula ioh ia ka kabu kaba nyngkong eh bad ula shut ia ka bol hynrei u nongapkol ka Mawlai u Lambhamiki Lamare ula ioh ban iada noh ia katei ka bol ban ym rung shapoh kol. Ka jingtioh thep kol u Damanbhalang kadei hadien ba kala don ka jingbym iasngewthuh jingmut hapdeng u nongapkol bad ki nongialehkai shadien jong ka Ladthalaboh kaba la plie lad ia u ban thep da kaba suk.
Watla ka Ladthadlaboh kala pyni ia ka jingkhlain ka jongka hynrei kam shym la lah pat ban thep kol namar ka jingtbit ki nongialehkai shadien jongka Mawlai.
Ka Mawlai kala ioh ia ki katto katne ki kabu hynrei kam shym la lah pat ban thep kol.
Mynta ki nongpeitkai kin phaikhmat ia ka jingiakhun hapdeng ka Rymbai Shkenshynriah pyrshah ia ka lahduh jong ka MSL ha u 2019 ka Shillong Lajong ha ka jingiakhun ha ka semifinal ka baar.
Ia ka MSL la pynlong da ka Meghalaya Football Association bad la ioh ia ka jingkyrshan na ka sorkar jylla ha kaba ki kynhun ialehkai na kylleng ki district jong ka jylla kila wan ban iashimbynta.
