Shillong, Nailar 27: Ki pulit ka East Jaintia Hills kila iohkem ia arngut ki nong Bangladesh na khappud ka East Jaintia Hills, kiba suhbuit bad donkti ban pynrung tuh ia ki nong Bangladesh sha India.
Ia kine ki arngut la ioh kem hynnin ka sngi thohdieng da ki Pulit ka Umkiang PP bad ki shipai BSF bapoh ka jingialam u Sub Inspector S Buam.
Ki Pulit kila iohkem ia kine ki runar da ka jingioh jingtip ba thikna ba kine ki arngut ki dei kiba suhbuit bad pynrung tuh ia ki nong Bangladesh sha India ha kine ki khyndiat bnai bala leit noh lyngba ka Kuliang-Ratacherra.
Kat kum ka khubor Pulit, la iathuh ba kane ka kynhun kala iohi ia ka kynhun ki nong Bangladesh ha kawei ka jaka khlaw ba don marjan bad ka jaka ba khlem ker sainar shah ha Pyrtakuna.
Hynrei da ka jingkloi ban leit khynra kane ka kynhun ki Pulit bad BSF, kila ioh bat ia kine ki arngut katba kiwei pat kila ioh ban phetkrad biang sha Bangladesh.
Kine ki arngut ki dei kiba la ithuh kyrteng da u Misba Uddin ba 31 snem bad u Badrul Alom ba 30 snem. Kine baroh arngut ki dei n aka Shnong Darponagar, Bangladesh.
U Misba Uddin u dei uba la shah thwet ha kiwei kiwei ki kam bymman. Ia kine ki arngut la pynngat ha ki kyndon ain ba tyngeh bad ka jingtohkit mynta kala iaid shakhmat.
