Nongpoh, Nailar 26: Hashwa ba ki ar jylla ka Meghalaya bad ka Assam kin ïaid shakhmat ban sdang ïa ka jingïapynbeit pud jong ka wat kaba ar, ka Synjuk ki Rangbah Shnong ka Raid Nongtung ha Block II ki la dawa ia ka Sorkar Jylla ba kan pynthikna ba ka ‘Law Kyntang’ jong ki 12 Kur ka dei ban neh hapoh u pud u sam ka Jylla Meghalaya.
Kane ka Law Kyntang ka dei kaba la tip kum ka Mawbah Ki Khad-ar Kur Nongtung Ummat, kaba don hapoh ka Raid Nongtung, Ri-Bhoi District. Kane ka khlaw ka don kumba 10 akar bad ka dei kaba don hapdeng duh jong ka Raid.
Ia kane la iathuh da u Nongialam ka Synjuk Bah B Sohtun, uba la pynpaw ba kane ka Mawbah ki Khad-ar Kur ka dei kaba la pyndonkam da ki paid ka Raid Nongtung kum kawei ka lum kyntang ban thang bad ruh ban buh jingkynmaw ia ki shyieng jong ki Nongialam kiba la khlad noh jong ka Raid.
“Haduh kane ka kynti, ki Nongialam ka Raid ki dang ri dang sumar ban pynneh ia kane ka Mawbah kaba la don naduh ki por jong ki Longshuwa Manshuwa. Dang shen ngi la ioh ia ka mang tyngka na ka Tnad Integrated Basin Development ka Sorkar Meghalaya ban maramot bad tei ia ki jingdonkam ha kane ka khlaw” ula ong.
Une u Nongialam ka Synjuk ula ong ba ka sorkar Jylla kam dei ban klet ia kane ka Law Kyntang ha ka jingiapynbeit pud jong ka wat kaba ar bad ban pynthikna ruh ba kane ka jaka ka dei ban hap ha ka map jong ka Jylla Meghalaya.
