Shillong, Nailar 26 : U Myntri ka tnad Community & Rural Development Block, Bah Hamletson Dohling hynne ka sngi u la lum ia ka jingialang bishar kam bad ka State Rural Employment Society, (SRES) kaba dei ka Nodal Agency ba pyntreikam ia ka skhim MGNREGA, PMAY-G, RGSA, CFP, bad kiwei kiwei ki skhim ba bei tyngka da ka sorkar pdeng.
Ha kane ka sngi jingialang, ka jingiakren kaba sani kadei eh halor ka jingpyntreikam ia ka skhim MGNREGA bad ia PMAY-G. Kiba la iadonlang ha ka jingialang ki kynthup ia u Secretary, ka tnad C&RD, Bah T. Lyngwa, IAS, Mission Director, SRES u Sibhi Chakravarthy Sadhu, IAS ryngkat bad u Joint Mission Director, SRES, Kong Iaraphunlin Diengdoh nalor ki ophisar
Ha katei ka jingialang, ki ophisar ki la pyntip ruh ia u Myntri halor ka jingtreikam kiba iadei bad kitei ki skhim la ka long ha ka jingiaid ka kam lane ha ka jingtyllun ka pisa.
Haba iadei bad ka skhim MGNREGA, la pyntip ia u Myntri halor ka jingdon ki jingtrei kiba sahteng bad ka jingbym lah jong bun ki block ban kot ia ka 60 persen ka jingtrei hapoh ka NRM.
Na ka liang u Myntri u la banjur ruh halor ka jingdonkam ban don ia ka Area Officer App bad kumta u la kyntu ia ki ophisar jong ki distrik bad ruh ha ki block baki dei ban shim ia ka jingkitkhlieh ba kin peitngor ia baroh ki projek kiba pyntrei lyngba katei ka skhim.
U Myntri ula wad jingtip ruh halor ka bhah kaba ka jylla ka dang dei ban pyllait naka bynta ban pyntyllun stet ia ka jingpyntrei ia kitei ki skhim baroh.
Haba iadei bad ka skhim PMAY-G, la pyntip halor ka jingkdup lang noh ia ka PDIA method naduh u Naitung 2020 bad ban jur halor ka jingdonkam jong ki ophisar na ka jylla, distrik bad ha ki block kynthup ia ki nongialam shnong bad ki paidbah ba kin pynstet ia ka jingtreikam khnang ban ioh pyndep noh ia ki iing baroh khamtam naduh ka snem mang tyngka jong u 2016-17
U ong ruh ba kane kan iarap ban pyntyllun stet wat ia ka jingpyllait pisa na ka sorkar pdeng lyngba ka Ministry of Rural Development sha ka jylla.
La pyntip ruh ia u Myntri halor ki iing kiba sahteng ban pyndep bad ruh ia ki jingeh ba ki kynduh khamtam haba iadei bad ka jingwad jaka ban pynshna iing na ka bynta kito ki nongioh jingmyntoi ki bym don jaka puta, nangta ka jingpynwan lang hajuh ia kiwei ki tnad nalor kiwei kiwei ki jingeh ba kynduh da ki distrik bad ki block bad haba iadei bad ka Awaas+ (Inclusion list) ha kane ka snem treikam jong u 2021-2022.
Da kaba banjur halor ka jingdonkam ban ai jinghikai ia ki ophisar, u Myntri u la ai jingmut ruh ia ka SRES ban pynlong noh da ka State Level Workshop na ka bynta ki nongtrei ha ki Block khamtam eh na ka bynta ki BDO ba thymmai bad ruh ki Junior Rural Development Officer ban kyntiew ia ka rukom treikam ha ki liang baroh.
